CYMA, MTP leh CYLA-te an ṭhukhawm; ráltlân leh kawngpuiah hma an laho dawn

Central YMA, Central YLA leh Mara Thyutlia Py (MTP) hruaitute chu nimin khan YMA Sub-Headquarters, Lunglei conference hall-ah an inkâwm a; ráltlân, kawngpui leh thil dang ṭhenkhatah hmalakho an rél.

Inkawmhona hi CYMA president R Lalngheta'n a kaihruai a, 'Kan ṭhenawm ram aṭanga mahni sahimna zawnga rawn ráltlân chungchangah engtin nge lungrual zawkin thawhho a nih theih ang' tih sawiho a ni a, thawhhona turte an duang.

'Sorkarin sum tam tak sénga a siam Mizoram chhunga inkalpawhna kawngpui chhe hma lutuk ṭhin hi hei aia ṭha zawka an siam theih nan thuneitute hnenah thlen ni se' tih pawh an sawiho a; hmalak dan tur an rél. 'Mizoram kawng siam, ṭha lo tam tak hi chanchin inhrilh tawna kan ram tana ṭha zawka siam a nih theih nan hmalakho ni se,' an ti.

Zemabawk leh Tuipang inkar NH-54 kawngpui siamṭhat a nih theihna atana hmalak te, Lunglei tlâk lam by-pass road siam thuai a nih theih nan chak taka hmalakhote leh, Aizawl-Lunglei inkalpawhna kawngpui siamṭhat a nih theih nana hmalakte an rêl.

'Mizoram chhunga NGO liante hian thawhhona ṭha zawk engtin nge kan neih theih ang' tih chungchangah pawl pathumte chuan, hnam inpumkhatna atan tun aia ṭha lehzuala thawhho ṭha an ti a; pawl inkhawmpui lian an neihah special item inneih tawnsak ṭhin turin thu an dah bawk.