Forest clearance chungchanga harsatna sutkian dan tur sawiho

Environment, Forest and Climate Change minister TJ Lalnuntluanga hoin nimin khan a pisaah Seling-Champhai (NH-6) kawng zauh meka forest clearance chung-changa harsatna awmte sutkian dan tur sawiho a ni. Minister chuan, fûr ruahtui tlâk nasat hmaa hna zawh a nih theih nan hma la turin kawng siamtu leh sorkar hotute a chah.

Ṭhutkhawmah hian additional principal chief conservator of forest (FC) RS Sinha, deputy conservator of forest (FC) MZ Singson leh NHIDCL executive director Virender Jakhal te an tel a; forest clearance chungchanga Ministry of Environment, Forest and Climate Change hnuaia Integrated Regional Office (IRO), Shillong dàwr a nih hnua April 17, 2023-a stage-1 approval an rawn pek chungchang sawiho a ni.

TJ Lalnuntluanga chuan, Champhai tlangdung mipui leh hmunpui pan ngai damlote'n an nghahhlelh Champhai-Aizawl kawng siam chu zawh thuai a nih theih nan EFCC department hotute chu NHIDCL hnena demand note pe thuai turin a hriattir a; NHIDCL lam pawh thil ṭulte buaipui a, IRO Shillong-in a pawmpui tawh angin NPA leh CA pawisa a rang thei ang bera pe chhuak turin a chah.

Minister chuan, NHIDCL-in pawisa an pek veleh EFCC department chu hna thawh phalna pe turin a hriattir a; fûr ruahtui tlâk nasat hmaa hna zo hman thei tura ṭan la turin NHIDCL leh EFCC department hotute a hriattir bawk.