US palaiin Governor leh CM a kâwm
Kolkata-a United States consul general Melinda Pavek chuan nimin khan Governor Hari Babu Kambhampati leh chief minister Zoramthanga te an chênna ve veah a kâwm.
Raj Bhavan-a inkawmnaah Melinda Pavek chuan, Mizoramah sumdawnna lama thawhhona a awm theih dan turte Governor a zawt a; Governor chuan, horticulture lam - mau, dragon fruits leh thil dang ṭhenkhatah te, services sector (nursing, healthcare, paramedical profession leh hospitality)-a Mizoramin theihna a neihte bakah, thil danga Mizoramin hmalakna a neih mek leh a thlen chinte a hrilh.
Hari Babu Kambhampati chuan, India sorkarin Mizoramah hmasawnna lian tham tak tak - rél kawng siam leh national highway zauhte a buaipui mek tih a sawi a; rél kawng tihpuitlin a nih a, Kaladan Multi Modal Transit Transport Project a puitlin bawk chuan Mizoramah kawng tinrenga hmasawnna lian tham tak a awm dawn niin a sawi bawk.
Chief Minister's banglaa inkawmnaah Melinda Pavek leh CM Zoramthanga chuan, kumin March thlaa Mizoramin B20 meeting a thlen chungchang te, ei leh bar tihhmasawnna tura Mizoramin theihna a neih te, kutkawih sumdawnna lama ṭhalaite hmasawnna chungchangte an sawi dun.
Zirna leh environment lama Mizoram dinhmun te, Mizoram hmathlir te, Myanmar leh India inlaichìnna te, khawchhak lam aṭanga ruihhlo rawn lut ṭhin leh ruihhloin khawtlang nun a nghawng dante an sawi dun bawk.