LMC sorkar thar lak luh a ni; LMC chairman - Lalzuithanga

Lunglei Municipal Council (LMC) sorkar chu nimin khan Lunglei Convention Centre hall-ah lak luh a ni a; councillor 11-te rinawmna thu tiamtira lak luh an ni.

LMC sorkar lâk luh inkhawm hi LMC chief executive officer H Lalhmingthanga'n a kaihruai a, councillor atana thlan mi 11-te chu Lunglei bawrhsap Ram-dinliani'n rinawmna thu thiamtirin a la lut a ni.

Councillor-te lak luh an nih hnuah Lunglei Bawrhsap kaihhruaiin LMC sorkara hotu turte thlan nghal a ni a, LMC chairman atan Lalzuithanga, ward-III thlan niin, vice chairman atan K Lalrinawma, ward-VII thlan a ni. Chairman leh Vice chairman-te hi Bawrhsapin rinawmna thu tiamtirin a la lut nghal.

LMC chairman Lal­zui­thanga chuan execu­tive councillor atan Lalhruaitluangi Sailo, ward-I leh Zorinsanga Hmar, ward-IX te a ruat a, anni pawh hi executive councillor ni turin rin­awmna thu tiamtira lak luh nghal an ni bawk.

Lak luhna inkhawmah hian LMC councillor atana thlan tlinte an tel kim a; chungte chu - Lal­hruaitluangi Sailo (ward-I), Lalmuanpuii Renthlei (ward-II), Lalzuithanga (ward-III), R Lalramzauva (ward-IV), Zonunmawii (ward-V), R Lalremsiama (ward-VI), K Lalrinawma (ward-VII), Malsawmkimi Khawl­hring (ward-VIII), Zorinsanga Hmar (ward-IX), Judy Lalhriatpuii (ward-X) leh Vanlalliana Pachuau (ward-XI) te an ni.

Nimin vêk khan LMC ṭhutkhawm hmasa ber neih nghal a ni bawk.