KHAWTHLIR

LC inthlan

Vawiin hian Zemabawk, Durtlang Leitan leh ITI Vengahte local council by-election neih a ni dawn a, zing dar 7 aṭanga tlai dar 5 thleng vote thlak hun hawn a ni ang. Member pasarih awmna Zemabawk LC by-election-ah hian member zawng zawng thlan tur a ni a, Durtlang Leitan leh ITI Vengah chuan LC member pakhat ve ve thlan tur a ni thung. Vote thlak zawhah vote chhiar nghal a ni ang.

Chhawmdawlna hlân

Governor Office kaltlanga chhawm­dawlna, Governor Discretionary Grant hmangin nimin khan Kolasib bawrhsap John LT Sanga'n Kolasib khawpuia ruihhlo ngai, fahrah leh pianphunga rualbanlo enkawlna pathum - Enna In (Boys Home), TNT leh Audrene Scism Children Home-ah ṭanpuina Rs 25,000 ṭheuh a hlân. Enna Inah mi 17, TNT, Khuangpuilamah mi 272 leh Audrene Scism Children Home-ah naupang 34 an awm mek a ni.

Hlawh siam inzirtir

Lunglei District Treasury Office chuan nimin khan Pukpuia Extension Training Centre-ah Integrated Financial Management and Information System (IFMIS) kaltlanga bill leh hlawh siam dan zirhona an buatsaih a, Lunglei district-a sorkar department 69 aṭangin mi 130 an tel.

Lawmpuina hlân

MZP Gen. Hqrs chuan MZP Computer Center-a CCC course zir chhuak zinga ti ṭha zual mi 10 hnenah nimin khan lawmpuina pawisa an hlân. MZP Computer Center hi kum 2022 tàwp lama din a ni a, NIELIT, Aizawl nen thawk dunin, NIELIT lamin zirlaite an zirtir a, zirlaite'n a thlàwnin computer an zir a ni. Batch hmasa berah mi 60-in an zir a, batch hnihnaah mi 100 velin zirin an exam mek a, batch thumna admission kalpui mek a ni bawk.

SHC-ah rângva sem

Sinlung Hills Council (SHC) huaihawtin nimin khan Sakawrdaiah SHC huam chhunga khawsak harsa, in chung chhe tawh leh in chung khuhna nei ṭha lote hnenah rângva sem a ni. Rangva semte hi bundle 362 a ni a, SHC chief executive member Lalthlamuana Hmar-in SHC bial tina sem turin SHC member-te hnenah a hlan a ni.

Keilungliah sawiho

Champhai District Committee on Post Completion Management & Maintenance of Dam Reservoir cum Recreation Centre at Keilungliah chu nimin khan an chairman James Lalrinchhana, bawrhsap hoin DC conference hall-ah an ṭhu a, hmalak tawh dan leh hmalak zel dan tur an sawiho. Agriculture department-in ṭhál thlai châwmna atana tui lâk an dilna chu zirchian hnuah a ṭul anga hmalak ni se, an ti.

Heroin man

Champhai police-te chuan April 17, Thawhṭanni zan khan heroin gram 88 (hawng 7) leh a neitua puh Lalthangvunga (46) s/o Lalhama, Chehkan, Myanmar nia inchhál an man a, Champhai Police Station-ah thubuai an ziak lut. Heroin hi international market-a cheng nuai 44 hû man a ni.

Hospital Disaster Management zirho

Sorkar laipuia Health & Family Welfare, GeoHazards International leh GeoHazards Society-te chuan nimin khan Health & Medical Education auditorium-ah Mizorama sorkar leh mimal damdawi-in 28 tan Hospital Disaster Management Planning tih thupui hmangin training an buatsaih.
Training hi Health principal director Dr PC Lalramliana'n a hawng a; chhiatrupna thleng thei laka him tura damdawi-in enkawl dan zirho a ni a, vawiinah chhunzawma zawh a ni ang.