Mizoram zirna standard a hniam bik lo - Education Minister

School Education minister Lalchhandama Ralte chuan nimin khan Mizoram Rural Bank auditorium-ah National Education Policy (NEP), 2020 zirhona a hawng. Minister chuan, sorkar sikulah lâk (admit) sèn loh zirlai an awm tawh thu leh Mizorama zirna chu state pawn lam aiin a hniam bik loh thu a sawi.

Lalchhandama Ralte chuan, kal khawmte chu mahni zâwn ṭheuhah theihtawpa hma la tura fuihin, "Sorkarah mipuiin rinna an nghat ngam tawh hi a lawmawm a, sorkar sikulah admit sen loh zirlai an awm tawh," a ti a; NEP 2020 bawhzuinaah chak zawka kalpui a nih theih nan kal khawmte chu an ngaituahna hmang thar turin a sáwm.

NEP 2020 chu sorkar laipuiin a ngai pawimawh a, Mizoram sorkarin chak taka bawhzuiin hma a la mek tih sawiin Minister chuan, "Hripui léng karah pawh theihtawp kan chhuah reng a, department hrang hrang nghawng leh kaihhnawih a nih avangin thawhhona ṭha a ṭul. Ram chhung leh páwn zirna ngaituahin Mizorama zirna hi a standard a hniam bik lo a, hmasawn ngaihna erawh a awm," a ti.

Lalchhandama Ralte chuan, thiamna tak tak paw chhuaka zirlaite'n chhawr tlak thiamna neihtir NEP-in a ngai pawimawh tih a sawi a; zirlaite cho chhuaka phûr taka an zir theih nan sikul nuam leh chhenfâkawm siam turin sorkarin hma a lak nasat thu te, zirlaite'n ngaituah thiamna an neih theih nan leh zirtirtute dinhmun siamṭhaa an zahawmna vawng him turin hmalakna kalpui zel a nih thu te, taksa sâwizawi leh infiamna lamah pawh nasa taka hmalak mek a nih thute a sawi bawk.

Symposium hi School Education, Higher & Technical Education leh Planning & Programme Implementation department-te'n an buatsaih a ni a, mithiamte'n thil pawimawhte an sawi. Vawiinah chhunzawma zawh a ni ang.