Revenue Minister-in NGDRS a tlangzarh

Minister Lalruatkima chuan nimin khan Mamit DC conference hall-ah Computerisation of Registration, National Generic Document Registration System (NGDRS) a tlangzarh a, Sub-Registrar's Office (SRO) a hawng bawk.

Lalruatkima chuan, inpum-khatna leh inlungrualna hmangin Mamit khawpuiin hmasawnna a nei chho tih sawiin, "Land Revenue & Settlement department hi department upa tak, a tel loa kan awm theih loh a ni. Ram inchuh vanga buaina thleng hi khawvela buaina tam ber a nih angin a chingfeltu department tana thil ṭangkai tak India ram puma kalpui mek, kan document-te vawn ṭhatna tur NGDRS Computerisation of Registration Mamit hawn a ni ta hi a lawmawm hle," a ti.

NGDRS chu ram pumah in leh lo lehkha pawimawh felfai taka dahṭhatna tura siam a nih thu sawiin Minister chuan, "Kan ram leina leh hralhnaah te, ramri buainaahte pawh he software hian kan harsatna a sutkian ka beisei. Court-in document registration loh chu thutlingah a pawm lo," a ti a, court-a thiamna atan NGRDS software hmang ṭhin turin mipui a chah.

LRS Minister chuan, online hmanga leiman (chhiah) pek theihna tur software tlangzarh thuai theih a beisei thu a sawi bawk.

Sorkar thuchhuah tarlan danin, Registration Act, 1908 hnuaiah dan angin NGDRS software hmangin in leh lo neitu nihna leh chanvote vawnhim a ni dawn a, sorkar leh vantlang hriata humhalh a, dan loa ram neih tumna laka vengtu tur a ni a; NGDRS website igrmizoram.nic.in ah lehkha pawimawh hrang hrang ziah luh theih a ni.