MADC-ah VC inthlanpui neih a ni

Mara Autonomous District Council (MADC)-a village council general election chu nimin khan tluang taka neih a ni a, vote thlak zawhah vote tlate chhiar nghal niin, result erawh kan hre hman lo.

MADC VC general election neih tur hi State Election Commissioner Laima Chozah chuan March 23, 2023 khan a puang a, March 30 thleng khan chuh tura hming pek luh hun hawn a ni. Inthlan hi tluang taka neih a ni a, buaina leh harsatna lian tham a awm hriat a ni lo.

Inthlanah hian candidate mi 1,250 an awm a, general seat chuh tur mi 1,011 leh hmeichhe tana seat hauh chuh tur mi 239 an ni. BJP-in candidate 454, Indian National Congress-in candidate 261, MNF-in candidate 402, ZPM-in candidate 84 an nei a, independent candidate 49 an awm bawk.

MADC hnuaiah hian VC 99 a awm a, voter 43,120 awmin, mipa 20,794 leh hmeichhia 22,326 an awm.

VC 99-a member awm zat tur chu 591 a ni a, member zinga 99 chu thlan tur ni loin, sorkarna siamtu party-te'n an ruat tur a ni. Member 492 chu mipuiiin an thlan tur a ni a, chu'ng zinga 99 chu hmeichhe tana hauh a ni.