Transport minister intawhkhawmnaah Mizoram Transport Minister a tel

Union Road Transport & Highways minister Nitin Gadkari kaihhruaiin April 17, Thawhṭanni khan New Delhi-ah state leh union territory (UT) hrang hranga transport minister-te intawhkhawm buatsaih a ni a, Mizoram Transport minister TJ Lalnuntluanga a tel.

Sorkar thuchhuah tarlan danin, TJ Lalnuntluanga chuan, Hlimenah lirthei ṭhat leh ṭhat loh endikna tur Inspection & Certification Centre sak mek a nih thu leh changtlung zawka thuam ṭhat a ngaih thu a sawi a; Union Minister chuan an lo en zui tur thu a hrilh.

Vehicle Scrapping Policy chungchangah TJ Lalnuntluanga chuan, Mizoram, sum leh pai dinhmun la hniam takah lirthei neitute'n lirthei thar lei lehna turin harsatna an tawh theih dawn avangin vehicle scrapping ti turte tana incentive/relief measure siam turin a ngen a; Nitin Gadkari chuan ngaihtuah zui an tum tur thu a lo sawi.

TJ Lalnuntluanga chuan, National Electric Bus Programme hnuaia electric bus kalpui dan tur sorkar laipuiin a duan chu ṭha a tih thu a sawi a; electric bus chu Mizoram, tlang ramah hman tlâk a nih dawn leh dawn loh a zawhna chu Union Minister chuan, a hman tlak tur thu leh a siamtu company-te nen pawh hemi chungchangah hian ṭhutkhawm vat a nih tur thuin a chháng a ni.

Intawhkhawm zawhah TJ Lalnuntluanga chuan Nitin Gadkari a kâwm a; Champhaia Khankawn leh Kanan Veng inkar kawng km. 3.7-a thui, NH-6 kawng siam mekin a huam chu double lane a siamsak turin a ngen.

Myanmar nena insumdawn tawnna hmun Zokhawthara Ṭiau luia Mizoram leh Myanmar inkalpawhna lei siamna tur cheng vbc. 22.50 hû project siam chu tihhlawhtlinsak turin a ngen a; Zokhawthar thleng national highway-a puanna gazette copy a pe nghal. Union Minister chuan, a hlawhtlin theih nan hma a lo lak tur thu a hrilh a ni.