Chhimphei Focus-in ṭanpuina sum an hlân

Chhimphei Focus chuan nimin khan Zoram Medical College / State Referral Hospital Poor Fund-ah damlo harsate ṭanpuina atana concert an buatsaiha sum an hmuh Rs 35,750 an hlân.

Chhimphei Focus hian ZMC/SRH-a damlo harsate puihna atan Poor Fund-a chhùn luh turin March 31, 2023 khan Sateek Futsal Ground-ah concert an buatsaih a, chuta ṭanga sum an hmuh Rs 35,750 chu ZMC/SRH Poor Fund-ah an chhûng lut a ni. Poor Fund hlanna inkhawm tâwi nimina ZMC Director pisaa neihah Concert Organising Committee chairman Lalrindika'n ZMC director Dr John Zohmingthanga hnenah a hlàn a ni.

Chhimphei Focus president T Zoliana chuan, an pawl din chhan chu Chhimphei (Hualngohmun leh Sailam inkar) huam chhunga mite tan malsawmna ni tura hmalak a nih thu sawiin, "Hmalakna hmasa atan ZMC-a awm damlo harsa zual tan hma kan la a ni," a ti a; charity concert an buatsaiha thawhlawm thawhtute chungah an lawm takzet tih a sawi.

T Zoliana chuan, Chhimphei huam chhunga khuate chu Tlawng, Tuirial leh Tuirivâng lui hnára awm an nih thu sawiin, "Tuihna humhalh, ramngaw leh nungcha humhalh, faina leh thianghlimna lama hmalakte kan tum," a ti bawk.

ZMC director Dr John Zohmingthanga chuan, an damdawi-ina damlo khawsak harsate puihna tura Chhimphei Focus-in sum ṭhahnem tak an pe chu an lawm tak zet thu sawiin, an kal zelna turah duhsakna a hlân a; ZMC registrar Dr Jane R Ralte pawhin thu a sawi a ni.