Zu zawrh chungchanga ZONET thu puan sawifiah turin MNF President-in a phût

MNF president leh chief minister Zoramthanga chuan, ZONET Cable TV chanchin tharah zu zawrh thláwptu zingah kohhran hruaitute an awm anga puan a nih thu sawiin, sawifiah turin ZONET Cable TV a phût.

MNF thuchhuah tarlan danin, April 17, 2023 (Thawhṭanni)-a Mizo Hnam Rûna inkhawma thu sawitu Zoramthanga chuan, zu khapna dan, The Mizoram Liquor Prohibition Act, 2019 chungchang ZONET Cable TV-in an zir chiannaah, zu zawrh thláwptute zingah sorkar hnathawk, kohhran rawngbawltu leh khawtlang hruaitu eng emaw zat an tel nia puan a nih thu leh mak a tih thu a sawi a ni.

Zoramthanga chuan, "ZONET hian zu zawrh thlàwpna lam thu chanchin thar headline meuhah hmangin zu zawrh leh a nih theihna tur lam hawiin a zir chiangtu tur an intir niin a lang thei a. Zu chu zawrh a nih leh theihna tur goal-a khalh luh tumna ngar ngar leh hetiang hmalakna an rawn chhawp chhuak hi pawi ka ti a, kohhran rawngbawltute sawi lan a ni phei hi chu a pawi takzet a ni," a ti.

MNF President chuan, "ZONET hian tute nge an contact tih eng mah an sawi lang lo a, Excise department-a thawktu pakhat sawi dan tih te, mi ṭhenkhat sawi dan tihte bakah, kohhran hruaitute zinga miin zu zawrh leh chu ṭha an ti, ni tein a puang," a ti a; ZONET chanchin thar puan chu an ngaih thu tak thu a sawi.

Zoramthanga chuan, "Presbyterian kohhran hruaitute hian zu zawrh leh hi ṭha an ti dawn em ni? Baptist kohhran leh kohhran dang hruaitute hian zu zawrh hi ṭha an ti dawn em ni? Keini, MNF chuan zu zawrh leh hi ṭha kan ti lo a, zu zawrh chhunga dik lo tak leh dan pangngai lo taka thihna a thlen tamziate kan hmu fiah tawh. Kan tawrhna kha rapthlak kan ti a, mihring nunna thàp tur leh chhungkaw keh darhna thlen turin zu hi zawrh nawn leh chi-ah kan ruat lo," a ti.

Zu chungchangah MNF party-in dinna a nei sa tih sawiin MNF President chuan, "Kohhran hruaitute pawh hian zu zawrh leh hi ṭha an ti lo a nih chuan chiang taka an sawi nawn leh hi a pawimawh hle. Sorkar hnathawk, kohhran hruaitute leh khawtlang hruaitute’n zu zawrh chu ṭha ti zawk nia ngaih theih tura ZONET-in a puang hi tihchian a ngai hle," a ti a; The Mizoram Liquor Prohibition Act, 2019 chu Mizo mipui, kohhran hruaitute leh MNF party duh dan anga siam niin a sawi bawk.