Jail aṭangin mi panga an tlânbo

Lunglei District Jail-a táng mek zinga mi panga chu nimin zing dar 1:30 leh 2:15 inkar khan an tlânbo a, he thu ziah lai thleng hian man an la ni lo.

Vanglaini thu dawn danin, mi pangate hian êk-in bang lungrem an tichhia a, hmun pahnih aṭangin jail hungna bangah láwn liamin an tlanbo a ni. Jail Warder-in zanlai pelh dar 1:30-a jail chhung a fan kual lai chuan tlân chhuak an la awm lo a; zing lam dar 2:15-a a fan kual lehnaah tlanbo an awm tih a hria a ni.

Jail Warder hian Assistant Jailor a hrilh nghal a, thawktute an inko khawm zui a, táng tlanbote chu Lunglei khawpui leh a chhehvelah zawn nghal a ni. Nimin zing dar 4:30 vel khan Lunglei Police Station-ah FIR an thehlut bawk.

Jail aṭanga tlânbo zinga pali chu ruihhlo vanga man, NDPS Act hnuaia thubuai siamsak an ni a; mi dang pakhat Lalchawimawia chu September 6, 2021-a Vanlalduati (52), Lunglei Chanmari vit hlumtua puh a ni thung. An vai hian thiam loh chantir an la ni lo a, thubuai ngaihtuah lai mek an ni.