MADC chhunga VC inthlanah VC 41 latu BJP an che ṭha ber

Mara Autonomous District Council (MADC)-a village council by-election April 18, Thawhlehnia neih chu tluang taka neih niin, vote pawh tluang taka chhiat zawh a ni a; BJP cha ṭha berin inthlanna VC 98 zinga 41-ah an chak.

State Election Commission (SEC) tarlan danin, MADC VC inthlanpuiah hian voter 43,120 zinga mi 33,368-in vote an thlak a, vote tla percentage chu 77.38 a ni. Voter-te hi mipa 20,794 leh hmeichhia 22,326 an ni a, mipa 16,409 leh hmeichhia 16,959-in vote an thlâk.

Vote tlak ṭhatna ber VC, Supha-ah vote 97.06% a tla a, a tlak chhiatna ber Lopu III-ah 47.34% chiah a tla thung. Hetih lai hian, Lopu-I khuaah chuan vote thlâk a ni lo.

SEC tarlan danin, MADC VC inthlana che ṭha ber Bharatya Janata Party (BJP) chu inthlanna VC 98 zinga VC 41-ah an chak a, a dawttu MNF chu VC 24-ah an chak. Congress party-in VC pariat leh ZPM-in VC pahnih an la a, chak bik awm lohna khua/veng 22 a awm bawk.

BJP hian VC seat 487 zinga 232 an la a, MNF-in seat 155, Congress-in seat 78, ZPM-in seat 13 leh independent candidate-te'n seat pakua an la a ni.