Power siam turin Tuivawl leh Tuirini-ah Mizoram sorkar a insáwrbing - PE Minister

Power & Electricity minister R Lalzirliana chuan nimin khan Thenzawl Golf Course & Resort Convention Centre-ah 48th Commercial Coordination Sub-Committee Meeting of North Eastern Regional Power Committee a hawng a; kawlphetha megawatt 24 pe thei tur Tuivawl leh Tuirini luiah Mizoram sorkar a insáwrbing mek niin a sawi.

R Lalzirliana chuan, Mizoram sorkarin kawlphethaa mipui mamawh phuhru turin power siamtute aṭangin kum tin eng emaw zat a lei ṭhin thu a sawi a, "Power kan leina sum leh pai pek thuah hripui vangtein harsatna kan han tâwk ve bawk a, tunah chuan hripui a kiang a, power man pekah nasa lehzualin kan insawrbing thei ta," a ti.

Mizoramah hydel project kalpui mek eng emaw zat a awm thu sawiin Minister chuan, "Tunah hian kawlphetha MW 24 pe thei tur pahnih, Tuivawl leh Tuirini-ah Mizoram sorkar a insáwrbing mek a, CPSU hmalaknain Mat Sekawiah MW 76 pe thei tur leh Koladyne-II ah MW 460 pe thei tur bawhzui mek reng a ni bawk," a ti. Green energy siam chhuah lamah India sorkarin nasa taka hma a lak thu a sawi bawk.

Ṭhutkhawma tarlan danin, kum 1962 khan Aizawl khawpuiin power supply a hmu ṭan a, diesel generator hmanga siam a ni. Tunah chuan Mizorama khaw 725-ah kawlphetha lak luh a ni tawh.

Commercial Coordination Sub-Committee meeting-ah hian India hmarchhak state hrang hranga Power & Electricity department hotu te, North Eastern Regional Load Despatch Centre, NEEPCO, Powergrid Corporation of India Limited leh NTPC aiawhte an tel a ni.

PE MINISTER THUSAWI ṬHENKHAT

!. Mizoramin megaqatt 29.35 siam chhuahna hydel power plant kan nei ṭhin a, nikum khan Tlawva (MW 5) leh Kàwlbêm (MW 4) kan neih belh.

2. Tlungvelah solar power plant MW 2 siamna kan nei tawh a, Vankalah MW 20 siam thei kan nei leh tawh.

3. Vankal solar power plant hi April 25, 2023-ah kan hawng dawn.

4. Keifang leh Thenzawlah MW 10 pe thei solar plant thar pahnih din tum mek a ni.