2023-a Aizawla temperature sàn lai ber 33°C; April 13, 2017-ah Aizawl temperature 36.5°C

Nipui lai a ni a, tunlaiin Mizoram pumah khua a lum hle a, district ṭhenkhatah chuan naupang sikul kai hun pawh tihhma lailâwk a ni. Hetih lai hian, Aizawl bikah chuan State Meteorological Centre chhinchhiah chinah kumin aia khaw lum (temperature san) kum/ní a lo awm nual tawh.

Directorate of Science and Technology hnuaia Mizoram State Meteorological Centre (STC) hotute'n Vanglaini palai zawhna chhanga an sawi dawn danin, kumina khaw lum ber ní, temperature san ber ní chu April ni 16, ni 18 leh nimin ni 19 kha a ni a, temperature sàn lai berin celcius degree 33 a ni hlawm. Tun hnai ni 10 chhungin temperature san lai berin 30°C a tling vek a, a hniam lai berin 20°C chung lam vek a ni bawk.

STC hotute sawi danin, STC kháwlin a chhinchhiah chinah Aizawla khaw lum ber ni chu April 13, 2017 kha a ni a, a lum lai berin 36.5°C a ni. Kum khat chhunga a lum ber ní bikah, kum 2019-ah pawh khan 36°C a kái a, kum 2020-ah 33.6°C, kum 2021-ah 34°C leh kum 2022-ah 32°C a ni.

STC-in temperature an tehna hmun hi New Capital Complex-ah a ni a; Aizawla temperature aia a sànna hmun hrang hrangah a awm a rinawm thu leh Aizawl khawpui chhung bikah pawh a hmun azirin a inan loh theih thu sawiin STC hotute chuan, "Sairang, Bairabi leh Lengpui velah chuan Aizawl aiin a sang ngeiin a rinawm," an ti.

India Meteorological Department-in Mizorama temperature san lai ber leh hniam lai ber tura an hmuh lâwk dan an tarlan chu STC khawlin a taka a chhinchhiah dan nen a inan loh fo thu sawiin, "Vawiin (April 19) pawh hi IMD chuan maximum 37°C vela a dah laiin, Lengpui khu 34°C velin a dah thung," an ti a, a ngaihna an hriat bik loh thu an sawi.

Sorkar laipuiin ram chhunga state hrang hrangte chu heat wave action plan duang tura a tih thu sawiin STC hotute chuan, "Heat wave action plan duang turin temperature maximum 40°C chung lam a nih a ngai a, Mizoramah chuan 40°C hi kan la thleng ngai si lo a, action pan duang tura criteria (tehfung) hrang hrang enin, heat wave action plan duan hi a la ngai loin a lang," an ti.

State Meteorological Centre hotute chuan, state dangah chuan heat wave action plan an duang a, heat wave warning an tihchhuah reng thu an sawi bawk.