KHAWTHLIR

Thisen pe

Medhavi Foundation chuan nimin khan Civil Hospital, Aizawl blood bank-ah thisen pek huaihawtin, thisen unit 42 an pe a, petute mipa 32 leh hmeichhia 12 an ni.

Kuhva rah man

Assam Rifles-te chuan nimin khan Hnahlanah lirthei pakhat aṭangin dan loa Myanmar aṭanga kuhva rah lâk luh nia hriat ip 80 an man a, lirthei khalhtu Liana (18) s/o Lalzamliana, Ngur, Champhai nia insawi an man bawk. Champhaia Customs department hnenah an hlan. Kuhva rah an man hi Rs 44,80,000 hu a nih thu AR chuan an tarlang.

Lawmthu sawi

MNF party chuan thuchhuah siamin, Mara Autonomous District Council huam chhunga village council inthlanpui tluang tak leh felfai tak neih a ni chu lawmawm an tih thu an tarlang a, "Thlan tlin tharte'n sorkar nen thawhhona ṭha tak an neih zui kan beisei. Inthlan buaipuitu official zawng zawng chungah lawmthu kan sawi a, duhsak taka MNF party candidate vote-tu zawng zawng chungah lawmthu kan sawi a ni," an ti.

Mawlynnong tlawh

Mizoram Cleanliness Competition, 2022-a Mizoram district khawpui fai bera thlan Khawzawl khawpui chhunga VC member-te chu nimin khan Asia khawmualpuia thingtlang khaw fai bera puan Mawlynnong, Meghalaya tlawhpui an ni. VC member-te hian faina leh thianghlimna lama Mawlynnong khawtlang hmalak dante an zir a ni.

Mamitah mockdrill

Mamit District Disaster Management Authority leh 1st Bn. NDRF-te chuan nimin khan Mamita JNV School-ah lirnghing thlen palha chhanchhuah hna thwh dan inzirtirna, Earthquake Mock Drill an buatsaih. Mockdrill-ah hian sorkar official-te bakah zirlai te, khawtlang aiawhte an tel a ni.

Mizo History Khua

Lalhmachhuana Zofa lehkhabu ziah ‘Mizo History Khua’ tih chu nimin khan minister of state Robert Romawia Royte-in a pisaah a tlangzarh. Lehkhabu thar hi phek 735-a chhah a ni a, Rs 1,000 man a ni.

Huaisen lawmman

Ministry of Home Affairs chuan mi dang nunna chhan nana nunna thâpa chete chawimawina, Jeevan Raksha Padak Award dawng tura rawtna siam duh tan August 31, 2023 thleng hun a hawng a, Mizoram Home department Under Secretary hnenah pisa kai hun chhungin thehluh theih a ni. Rawt theihte chu October 1, 2021 leh kumin 2023 inkara thil thlengah a ni.

Tui harsatna sawiho

Mamita PHE executive engineer Helen Saibuangi hoin nimin khan a pisaah Mamit khawpuia tui harsatna leh tui bill thar chungchang sawiho a ni a; YMA Sub-Hqrs, VC leh Mamit District Consumer Union hruaitute leh thuthar thehdarhtute an tel. Cheng nuai 4,000 sénga Greater Mamit Water Supply Scheme-II siam mek chu November 2024-ah zawh tura ruahman a nih thu tarlan a ni.