Incentive Cash Award 2020-21 sem a ni

Sports & Youth Services minister Robert Romawia Royte chuan April 18, Thawhlehni zan khan Vanapa Hall-ah Incentive Cash Award 2020-21 a sem.

Incentive Cash Award 2020-21 hi infiamna discipline hrang hrang 11 - taekwondo, muaythai, shooting, arm wrestling, table tennis, boxing, motor sport, sepaktakrow, kickboxing, weightlifting leh football-a medal la infiammi 109 leh official mi 14, an vaiin mi 123 hnenah sem a ni a; award semna sport discipline-ah medal 199 lak a ni.

Cash award sem hi a vaiin Rs 44,88,150 a ni a; kum 2020-21 chhunga medal dawngtute hnenah Rs 22,88,150 leh kum 2022-a buatsaih Khelo India Youth Games 2021-a tel medal dawngtute hnenah Rs 22,00,000 hlan a ni.

Robert Romawia chuan, Covid-19 léng vanga punkhawm a harsat avangin Incentive Cash Award chu duh anga hmaah sem a harsat thu a sawi a, "Khawvelin infiammite a ngaihlu a, Mizoramah pawh infiammite ngaihhlut a ṭul," a ti.

Cash award scheme-in a tum ber chu infiammite tihphûr leh sang zawk an thlen theih nan te, an inenkawlna leh mamawh leina tura sorkarin ṭanpuina a pek a nih thu sawiin Minister chuan, "Mizoramin medal tam zawk a lak theih nan medal tamna sport uar zawka kalpui a ngai. A bik takin athletics, swimming leh archery-te hi Mizo ṭhalai tam zawkte'n luhchilh se ka duh," a ti a; Mizoram hmun pangaah sport school siam mek a nih thu a sawi.