Zo nun ze mawi chunghangah zirlaite leh ṭhalaiteah ṭan lâkho rêl

MZP leh zirtirtu pawl hrang hrangte chuan Zo nun ze mawi, aia upa zahna leh ṭawngkam hawihhâwmin Mizo ṭhalaiteah hmun a chan zel theih nan zirlaite leh ṭhalaiteah ṭan lâkho an rêl.

Nimin khan MZP conference hall-ah MZP leh zirtirtu páwl hrang hrangte'n inràwnkhawmna hun an hmang a, MZP president Lalnunmawia Pautu-in kaihruaiin, Mizo zirlaite'n Mizo chanchin, nunphung leh Zo nun ze mawi chungchangte zirlaibuah tam zawk an zir theih nan hmalakho dan tur an sawiho.

Inràwnkhawmnaah hian resolution an siam a, "Technology hmasawnna social media hrang hrangin min nuai mek karah hian Zo nun ze mawi, aia upa zahna, ṭawngkam hawihháwmin hmun a chan zel theih nan zirlaite leh ṭhalaiteah ṭan lâkho zel ni se ṭha kan ti," tiin an tarlang.

Kalkhawmte chuan, elementary aṭanga higher secondary syllabus hman mekah Mizo chanchin, nunphung leh Zo nun ze mawi chunghangte tam zawk telh a nih theih nan hmalakho an remti a, 'Nu leh pa leh aia upate chunga nun dan mawi lantir hi Mizote tih dan phung a ni a, a Pathian thu bawk a, tunlai khawvelah hian ṭhangtharte'n kan chhawm nun zel theih nan ṭan lâk tlân zel ni se ṭha kan ti," an ti.

Khawvela hnam hrang hrangte'n an hmànlai chanchinte leh nunphung an ngai pawimawh a, an zahpui lo tih tarlangin, "Hei hi khawvel hnam tinte tih dan phung a ni. Mizote pawhin kan nunphung leh tih dan ṭha khawvel kan hriattir zel theih nan zirlaite leh ṭhalaiteah ṭan lak zel ni se ṭha kan ti," an ti bawk.