US Consul General-in sorkar hotute a kâwm
Kolkata-a United States consul general Melinda Pavek chuan April 18, Thawhlehni tlai khan Health minister Dr R Lalthangliana leh Health department hotute Secretariat confernce hall-ah a kâwm a, a hnuah chief secretary Dr Renu Sharma a kâwm leh bawk.
Dr R Lalthangliana chuan, Mizoram chu Bangladesh leh Myanmar te nen ramri thui tak inṭâwm a nih thu sawiin, "Hei hian ram dangte nena insumdawn tawnnaah kawngro thui tak a su a ni," a ti a; India leh US inkarah thawhhona ṭha awm zel se a duh thu sawiin, Mizo zirlaite leh zirtirtute'n USA-ah exchange programme an neih theih nana hma lakpui turin a ngen.
Minister hian Health department hmalakna hrang hrang te, hriselna lama Mizoram dinhmunte a sawi a; HIV/AIDS, cancer, sikserh leh tuberculosis vanga harsatna Mizoramin a tawh mekte titawp turin US sorkar nen thawhhona ṭha neih a ṭul thu a sawi bawk.
Melinda Pavek chuan, Mizoram leh US sorkar ten thawhhona tur kawng tam tak an neih theih thu sawiin, HIV/AIDS, cancer leh natna dangte tihtawp an nih theih nan theihtawp chhuah a ṭul thu a sawi.
Chief Secretary leh US palai inkawmnaah thawhhona neih theih dan tur sawi a ni a; CS Dr Renu Sharma chuan, Mizoram sorkar leh US thawh dun theihna tur zingah - inkalpawhna, ei tur sawngbawlna, mau sawngbawlna, zin veivahna lam, hriselna, sumdawnna, thil thar hmuhchhuah leh mahni kea din theihna lamte a nih thu a sawi a, "Hengah hian thawhhona ṭha a awm chuan Mizoramin chak zawkin hmasawnna a nei thei ang, " a ti.
US Consul General chuan, India leh US inkarah inlaichinna ṭha tak a awm thu sawiin, "Hei hian Mizoram tan pawh rah ṭha a chhuah ngei ka beisei. Ram pahnih inkarah thawhhona ṭha zawk a awm theih nana ka ngaih pawimawh zual chu - mipui leh mipui inkara inpawhna ṭha zawk, zirlai leh sumdawngte visa pekah te, cyber security, solid waste management, industry leh hriselna lam a ni," a ti a; chak zawka hmalak a nih theih nan thawhpui turin Mizoram sorkar a sáwm.
US consul general Melinda Pavek leh a thawhpuite hian Mizorama an chàm chhungin sorkar hotu hrang hrang leh pawl ṭhenkhat hruaitute an kâwm a; nimin khan Mizoram an chhuahsan a ni.