Hmeichhe thattu leh sawisatu man an ni

April 16, 2023 zana Siaha district chhung, Phúrà khuaa Nangkhawching (48) thattu nia rin, a pasal Paduwong chu April 18, Thawhlehni zan khan MTP, Phura Branch hruaitute'n an man a, police hnenah an hlan. Laldingngheta, Chawlhhmun, Aizawl pawh hmeichhia a sawisak avangin man a ni tih police-te chuan an tarlang.

Thu dawn danin, Nangkhawching hi April 17, hawhṭanni zing khan Phura rama leiletah thia hmuh a ni a, a hmaiah hliam a neih bakah, a nâk ruh ding lam pahnih a tliak a ni.

Nangkhawchingi ruang hmuh tûk aṭangin a pasal Paduwong chu chin hriat lohin a awm a, MTP chuan an zawng zui a, Siaha district leh Lawngtlai district khaw hrang hranga mite hriattirin, khaw hrang hrangte chuan duty an indah a ni. April 17, 2023 zan dar 10 vel khan Phura khuaa MTP duty-te chuan Tokalo (Tonglolong) leh Pala (Palak) inkara Sakana lui hnárah an hmu a, an hual hnuah an man ta a ni.

Paduwong hi April 18, Thawhlehni zing khawvar hmain Phura police hnenah hlan a ni a, Thawhlehni vêk khan Siaha lamah lak a ni.

Remsangpuii, Chawlhhmun na taka sawisatu Laldingngheta (24) s/o Lalthangdela (L), Chawlhhmun pawh police-te'n April 18, Thawhlehni khan an man.

Thu dawn danin, Laldingngheta hi April 16, 2023 tlai lam khan a ṭhiante nen Setlak luiah an kal a, a haw leh lamah a ṭhiannu Remsangpuii, Chawlhhmun chu an inah pawt lut luiin, a pindanah a hruai lut a, a hnu lawkah hriamhrei hmanga a sawisa ta a ni. Laldingngheta hian Remsangpuii hi chema sâtin, a sat hliam nual a, a kut zungṭang pathum pawh a sat bung niin an sawi.

Remsangpuii hi ṭhenawm khawvengte'n an chhan hnuah Laldingngheta chu tukverh aṭangin a tlanchhe zui a; police-te'n an zawng nghal a, April 18, Thawhlehni khan an man tih Aizawl SP Rex Zarzoliana Vanchhawng chuan a tarlang.

Laldingngheta lakah IPC Section 324, 326 leh 307 tlawhchhanin Vaivakawn Police Station-ah thubuai ziah luh a ni a; Remsangpuii chu damdawi-inah enkawl mek a ni.