Siaha district mipuiin BJP-ah rinna an nghah ngam vang a ni - BJP President

BJP Mizoram Pradesh president Vanlalhmuaka chuan, MADC huam chhunga VC inthlanpuiah VC 98 zinga 41-ah BJP an chak chu Siaha district mipuiin BJP-ah rinna an nghah ngam vang a nih thu a sawi.

Vanlalhmuaka hian nimin khan Booth Sasaktikaran Meeting an neihah thu sawiin, "Siaha district-a VC inthlan neih zawh takah BJP-in Siahaa VC awm zawng zawng 99 aṭanga VC 42 kan siam thei leh VC neih belh mai theihna tur eng emaw zat kan nei thei tur hi Siaha mipuite'n BJP-a rinna an nghah ngam vang a ni a, a lawmawm kan ti hle," a ti.

Mizoram BJP President chuan, "Siahaah hian inthlan hmasa nena tehkhin phei chuan BJP-in nasa takin hma kan sawn a, MLA General Election lo awm turah pawh result ṭha tak kan nei ngei ang tih ka ring," a ti a; Siaha district BJP hruaitute leh member-te thawhrimna leh inpekna lawmawm a tih thu a sawi.

Vanlalhmuaka chuan, mipuiin BJP sorkar ṭhatna an hmu mek zel a, disrtict council mai bakah, Mizoram district dangah pawh nasa takin BJP an pung zel niin a sawi a, "BJP Mizoram chuan kan din chhan ang takin Mizoram leh hnam, kan sakhua humhim a, mirethei chawikan hi kan tum ber a nih avangin, Mizoram mipui, retheihna bawiha tâng mekte chhan chhuah hi kan hnathawh mek leh kan thawh zel tur a ni," a ti.