Ram hmasawn nan hmathlir ṭha Neih a pawimawh - Chief Minister

Mizoram Govt. Ad Hoc Aided School Teachers' Union (MIGASTU) chuan nimin khan Vanapa Hall-ah inkhawmpui lian an hmang a, chief minister Zoramthanga'n hmanpuiin, ram hmasawnna atan hmathlir ṭha neih a pawimawh thu leh hun rei lo têah adhoc school ṭhenkhatte sorkara dah tum a nih thu a sawi.

CM Zoramthanga chuan, Mizoramin ram hmangaihna tak tak nen hmathlir, tum ram nghet tak nena hma lam a pan zel a pawimawh thu sawiin, "Ram hmasawnna atan hmathlir ṭha neih a pawimawh. Hripui léng leh beisei lâwk loh khuarel chhiatna, ṭhenawm rambuai vangtein state-in harsatna a tâwk a, sum dinhmunin a tawrh phah. Heng zawng zawng karah hian thâ thlah loa hmasawn nan theihtawp chhuah zui zel a ni," a ti.

Hun rei lo têah adhoc school ṭhenkhat chu provincialise (sorkara dah) tum a nih thu sawiin Zoramthanga chuan, "MIGASTU-in sorkara in thil beisei in thlente a theih leh remchan dan ang zela a hlawh­tlinna tur dap a ni," a ti a; sum dinhmun zir zel chungin school provincialise tura hmalakna chu a tahtawla kalpui tum a nih thu sawi.

Chief Minister chuan, zirtirtute chu Mizoramin zirnaah hma a sawn zelna tura mawhphurtu pawimawh berte zinga mi an nih thu a sawi a, thâ thlah loa ṭhahnemngai taka thawk zel turin a chah a ni.

Khualzahawm School Education minister Lalchhan­dama Ralte pawhin thu sawiin, sorkarin zirna tihhmasawnna tura hma a laknate a sawi a, "Sorkarin zirlaite leh zirtirtute hmakhua a ngai pawimawh. Education huang chhunga association hrang hrangte nen thawhhona ṭha tak neih theih zel a ni hi a lawmawm. Sorkar pawhin sum dinhmun ṭha tâwk lo tak chung pawhin a remchan dan ang zelin an hmakhua a ngaihtuah a ni," a ti.

MIGASTU hnuaiah hian Mizoram khaw hrang hrangah high school 129 leh middle school 64 a awm a, thawktu mi 1,300 an awm mek a ni.