Hna phuailuai hi ka duh loh ber a ni - Deputy Chief Minister
Deputy chief minister Tawnluia chuan, nimin zing khan Ramhlun North Community Centre sak mek a tlawh a; hna phuailuai a duh loh thu leh vantlang hmun tur chu a tlo thei tur ang bera sak a ngaih thu a sawi.
Tawnluia chuan, hall sak mek chu hall lian tak a nih dawn avangin a sak chhung pawh a rei tih sawiin, "Veng mipui pawh an dawhtheih a ngai. Consultant leh contractor ten a ṭha thei ang berin an siam ang tih ka ring tlat a, hna phuailuai hi ka duh loh ber a ni a, vantlang hmun tur a nih avangin a tlo thei tur ang bera sak a ngai a ni," a ti.
Ramhlun North chu veng lian zinga a ngaih pawimawh a nih avangin harsa chung chungin Community Centre sak tur an duang tih sawiin Tawnluia chuan, "Ramhlun North mipuiin an hman ṭangkai tur vantlang hmun neih ṭha kan ti si a, Ramhlun North hi priority kan pek a ni," a ti a; Bungkawnah pawh hall sak mek a nih thu a sawi.
Deputy CM chuan, Ramhlun North Community Centre chu state sorkar sum liau liaua thawh a nih thu a sawi a, "A bul kan ṭan zo a, sum dap khawm chawpa thil tih a ṭul ṭhin a, phase hnihna kan ṭan leh nghal dawn. A bul kan ṭan tawh vangin hawn theiha peih a nih thuai kan beisei," a ti.
Tawnluia chuan, SMART City hnuaiah cheng vbc. 500 hmangin Aizawl khawpui chei nan hna thawh mek a nih thu te, SIPMIU kaltlanga Setlak lui chhuah Tlawng luia Aizawl khawpui tui lâkna thar tur siam chu zawh ṭêp tawh a nih thute a sawi bawk.
Sorkar thuchhuah tarlan danin, Ramhlun North Community Centre sakna atan hian cheng nuai 778.72 vel a ngai tura chhût a ni a; chhâwng nga tur niin, car/ two wheeler parking, chowkider quarters, restaurant, health sub-centre, meeting room, local council house, conference hall, badminton hall cum community hall-te awm tura duan a ni.