LC by-election-ah ZPM an che ṭha

April 19, Nilainia Aizawla local council pathuma by-election neiha vote tlate chu vote thlak zawh, zanah chhiar nghal a ni a, Zemabawk LC leh Durtlang Leitan LC-ah ZPM party candidate-te an chak a, ITI Veng LC-ah MNF candidate thlan tlin a ni.

State Election Commission tarlan danin, LC member zawng zawng thlanna, member pasarih awmna Zemabawk LC-ah ZPM candidate vek an tling a, MNF leh Congress party candidate aṭangin tling zo an awm lo. ZPM candidate pasarihte vote hmuh belh khawm chu 15,134 a ni a, MNF candidate pasarihte vote hmuh belh khawm 10,497 leh INC candidate pasarihte vote hmuh belh khawm 4,671 a ni.

Durtlang Leitan leh ITI Veng LC-ah chuan seat ruak pakhat ve ve hnawhkhahna turin by-election buatsaih a ni a; Durtlang Leitanah ZPM candidate thlan tlin niin, ITI Vengah MNF candidate thlan tlin a ni.

Tarlan tawh angin, Durtlang Leitan LC-ah voter zinga 59.65%-in vote an thlak a, Zemabawk LC-ah vote 67.05% leh ITI Veng LC-ah vote 57.80% a tla bawk.

State Election Commission chuan, inthlanna thianghlim, him, felfai leh muanawm a awm theihna tura theihtawp chhuahtu - inthlan buaipuitute leh venhimna hna thawktu zawng zawng te, thu puanzar duh leh hmalaknate puangzartu te, tlawmngai pawlte chungah an lawm thu an tarlang a, "Thawhhona ṭha avangin inthlanna thianghlim takin kan nei thei a ni," an ti.