Transport-in Rs 49,03,46,058 an hmu; hmuh tura bituk 20.98%-in an khûm
Transport department chuan financial year 2022-23 chhung khan chhiah (revenue) Rs 49,03,46,058 an hmu a, an hmuh tura sorkarin a tuk (target) cheng nuai 4,053.21 chu nuai 850.25 (20.98%)-in an khûm. Hetih lai hian, March 31, 2023 thleng khan Mizoramah chhiah pe ṭha lo lirthei 32,893 a awm.
Vanglaini palai zawhna chhangin Transport department hotute chuan, sorkar kum liam ta April 1, 2022 aṭanga March 31, 2023 thlenga chhiah sorkara an chhûn luh tura bituk chu Rs 40,53,21,000 a nih thu an sawi a, "Kum 2022-23 chhung khan chhiah hrang hrang aṭangin Rs 49,03,46,058 kan hmu a, target Rs 8,50,25,058-in kan khûm a, kan lawm tak zet," an ti. Target an khûmna hi 20.98% a ni.
Transport department hotute chuan, financial year 2023-24 chhunga chhiah an hmuh tura bituk chu cheng nuai 5,000 a nih thu leh, an target thar chu tlin ngei an inbeisei thu an sawi bawk.
Transport department hotute chuan, Mizoramah March 31, 2023 thleng khan lirthei chhiah pe ṭha lo 32,893 a awm thu an sawi.
Danin a phût angin lirthei neitute'n chhiah an pek ngei a ngaih thu leh chhiah pek loh chu dan bawhchhiatna a nih thu sawiin Transport hotute chuan, "Chhiah hi kawng hrang hrangin kan la ṭhin a, chhiah an pek loh hian sorkar tan sum hlohna a ni. Special drive leh no tolerance-te hmangin chhiah pe ṭha lote kan pektir a, hetah hian dan zâwmtute tan harsatna a awm lo," an ti. Chhiah pe ṭha lote hnenah a ṭul angin ba ṭhìnna lehkha pek an tum thu an sawi bawk.
