KHAWTHLIR
Thisen pe
Serchhip Colllege NSS unit, NCC leh Red Ribbbon Club-te chuan Serchhip College golden jubilee thleng tur pualin nimin khan Serchhip District Hospital tan thisen unit 62 an pe a, petute mipa 35 leh hmeichhia 27 an ni.
Tanpuina hlan
Governor Discretionary Grant hmangin nimin khan Mamit bawrhsap VL Remliana'n Mamita chhawmdawlna in pathum - Joshua's Children Home, Buannel Home leh Bethany Swadhar Greh-te hnenah ṭanpuina Rs 25,000 ṭheuh a hlân. Joshua's Children Home-ah mipa naupang 50 leh Buannel Home-ah naupang 25 enkawl mek a ni a, Bethany Swadhar Greh-ah chuan lut leh chhuak an awm reng thung.
Minister-in enfiah
Minister Lalrinawma chuan nimin khan a bial Tuikum constituency-a khaw pali - Hmunṭha, Khawbél, Hualtu leh Vanchengtea hmasawnna hnathawhte a enfiah a; a biala hmalakna zingah eizawnna, zirna leh hriselnate a ngaih pawimawh zual thu a sawi. Minister hi khawtlang hruaitute'n an ṭawiawm a ni.
MLA-in tumsak
Serlui bialtu MLA Lalrinsanga Ralte chuan tun hnaia Mizoram leh Assam inrìna bul, Vairengte Vengthara awmte zingah dan loa electric pawt, Power & Electricity department-in an tihtawpsak tâkte'n dan anga electric connection an neih theih nan ama pawisa aṭangin electric connection man tur chu a tumsak a, nimin khan pawisa a hlan. MLA-in electric connection man tur a tumsak hi chhungkaw 10 an ni.
Minister-in tlawh
Champhai South bialtu MLA TJ Lalnuntluanga, minister of state chuan nimin khan a bial chhunga Champhai South Higher Secondary School a tlawh a, Principal-in an mamawh a lo thlente buaipui nan Rs 50,000 a pe. Champhai South HSS-ah hian zirtirtu pasarih leh pawl 12 zirlai 31 an awm mek a, pawl 11 zir turte admission ngaihchan mek a ni.
Silai chungchang
Lunglei district magistrate Ramdinliani chuan, Lunglei district-a silai licence neite chu silai pahnih aia tam an nei/kawl a nih chuan thla hnih chhungin District Magistrate hnena hlàn (surrender) emaw, form awm sa hmangin an nupui, pasal, pianpui unau emaw an fate leh rochung tura ruat theih (legal heir) hminga thlâk turin a hriattir. Hun tiam chhunga surrender lo leh dilna thehlut lote chu an silai chhuhsak a nih dawn thu a tarlang.
AR-in meizial man
Assam Rifles sipaite chuan nimin khan Ruantlangah pick-up truck pahnih aṭangin ram dang meizial bawmpui 200, cheng nuai 300 hû an man a, Champhaia Customs department hnenah an hlan. Ruihhlo phurhna lirthei khalhtu pahnih - Vanlalropeka (20) s/o PBC Lalchhinchhiaha, Ruantlang leh Lalramlawma (27), Champhai Zotlang te an man nghal bawk.
Two wheeler taxi
Aizawl-Lengpui Airport leh Aizawl-Zoram Medical College inkarah phalna (permit) hranpa ngai loin two wheeler taxi-te tlân (service) phal a nih thu State Transport Authority secretary R Lalrammawia, Transport director ni bawk chuan a tarlang a, "Mipuite'n awlsam zawka Lengpui Airport leh ZMC an kal theiha atana tih a ni," a ti.
Vaihlo zirho
National Tobacco Control Program chuan nimin khan Mamit SP conference hall-ah police-te tan vaihlo ṭhat loh dan leh taksa a tihchhiat dante zirhona leh COTPA chungchang zirhona an buatsaih a, police mi leh sa 30 an tel.