ZPM party hruaitute'n lawmthu an sawi

ZPM president Lalliansawta chuan, Aizawla local council by-election neihna veng pathum zinga pahnih - Zemabawk leh Durtlang Leitanah ZPM party an chak chu lawmawm a tih thu sawiin, an hlawhtlin theihna tura thawktu zawng zawng chungah lawmthu a sawi.

Lalliansawta chuan, inthlana an chakna chu Pathian leh mipui a nih thu sawiin, "Hlawhtlinna kan chan theihna tura thawktu zawng zawng chungah kan lawm em em a ni," a ti a; mimal, unit leh block aṭangin ṭanpuina sum eng emaw zat an dawng tih sawiin, "Kan candidate leh an chhungte zawng zawng inpekna leh ṭhahnemngaihna avangin ZPM kan ropui ve mai chauh a ni," a ti.

ITI Venga an chak zo lo erawh pawi an tih thu sawiin Lalliansawta chuan, "Candidate leh party worker zawng zawng thawhrimna kan hriatpui a, hlawhtlinna chan hun a la awm ngei ang tih kan beisei tlat a ni," a ti a; sorkar ṭha siam tura theihtawp chhuah zel turin mipui a chah.

ZPM leader Lalduhoma chuan, "Pathian leh mipui zarah a vawi thum nan, Bible-in sual tinréng bul a tih sum thil tih theihna chu hnehin a awm leh ta a, lungthu a kim ta," a ti a; campaigner zawng zawng chungah lawmthu sawiin, 'Ka thlarau zawkin le' tih chu an innghahna ni zel se a duh thu a sawi.

ZPM Legislature Party deputy leader Vanlalhlana pawhin, a bial (Aizawl North-I) chhung Durtlang Leitan LC bakah, Zemabawk leh ITI Venga thawktu zawng zawngte chungah a lawm thu a sawi a, "Neutral-te'n in khawngaih vote hlu tak min pek avangin kan va lawm em. Lalpa'n malsawmnain a lêt tam takin vûr che u rawh se," a ti.

ZPM party chuan, LC member atana thlan thar zawng zawngte chu ram leh hnam leh khawtlang tan theihtawp chhuaha thawk turin duhsakna an hlan a ni.