Minister-in YMA inkhawmpui a hmanpui

YMA Sub-Hqrs, Champhai chuan nimin khan Ruantlanga Vanhnuailiana Hall-ah inkhawmpui vawi 8-na an hmang a, minister of state TJ Lalnuntluanga'n a hmanpui. Inkhawmpui thupui chu 'Ram leh hnam humhalh' tih a ni.

Inkhawmpui hi Champhai Sub-Hqrs. YMA president F Lalrinmuana'n a kaihruai a; Champhai distruct forest officer Lalduhthlana'n nungcha, tuihna leh ramngaw humhalh chungchang a zirtir a, chawhnuah hruaitu thar an thlang.

TJ Lalnuntluanga chuan, mahni intodelh chu zahawmna leh huaisenna a nih thu sawiin, "Ram hmasawn nan hlemhlêtna leh dàn loa thil tih do tlân te, ngaihtuahna dik leh hrisel neihte a pawimawh hmasa," a ti.

Minister chuan "Mahni intodelh hi zahawmna leh huaisenna a ni a, ram hmasawn nan hlemhletna leh dan loa thil tih do tlân te, ngaihtuahna dik leh hrisel neih a pawimawh hmasa," a ti a; YMA member-te chu Zo nun ze mawi chawi nungtu leh a hreawm lai pawha YMA khaidingtu nih tum turin a fuih.

NH-06 siam mek chu fûr ruahtui tlak hmaa zo hman tura ṭan lak a nih thu sawiin Minister chuan, "Mipui nghahhlelh em em kawngpui siam kawnga forest clearance buaipui ngaite pawh chak taka bawhzui a ni. Hnam naupang tê mah ni ila hmasawnna tam tak kan nei tawh a, chhawm nung zel turin ṭanrual a ngai," a ti a; hlemhlêtna tel loa mahni nih dan anga lan ngam a pawimawh thu a sawi bawk.

YMA Sub-Hqrs, Champhai hi June 18, 2008-ah din a ni a, a hnuaiah YMA group pathum - Tuipuiral Group, Vanhnuailiana Group leh Vanapa Group a awm bakah, branch 67 a awm a, YMA member 35,387 awmin, mipa 22,061 leh hmeichhia 13,326 an ni.