SEDP Phase 2 kalpui dan tur sawiho

Lunglei District Level Socio-Economic Development Policy (SEDP) Committee chu nimin khan an chairman Ramdinliani, DC hoin Lunglei DC conference hall-ah an ṭhukhawm a, Family Oriented SEDP Phase 2 kalpui dan tur an sawiho.

Ramdinliani chuan Lunglei district chhunga hlawhtling taka SEDP kalpui a nih theih nan uluk taka ngaihtuahna seng turin member-te a sawm a, SEDP Line Department te chu an hnuaia beneficiary te theihtawp chhuahpui tura chahin, "Beneficiary-te kaihhruai leh vil zui kawngah ṭhahnem ngai taka hmalak a ṭul," a ti.

Lunglei district-ah pawh Family Oriented SEDP Phase 2 hi constituency tinah beneficiary 1400 te dawng tura tih niin, beneficiary thlante chu Village Level SEDP Committee-ten District Level Committee-ah an thehlut ang.

Constituency ṭhenkhatin beneficiary list an theh luh chu District Level SEDP Committee in pawm ni se, constituency ṭhenkhat siam rem ngai awmte chu beneficiary list April 23, 2023 hmain thehlut tura tih an ni.

West Tuipui Constituency member in additional list chhungkaw 1,163 dilna chu District Level SEDP Committee-in SEDP Executive Board-ah dilsak tura pawm a ni.

Lunglei district-ah hian Line department pakua an awm a, chungte chu Agriculture, Horticulture, Animal Husbandary & Veterinary, Fisheries, Sericulture, Land Resources, Soil & Water Conservation, Commerce & Industries, UD&PA leh Tourism-te an ni.