Jail ngaihsak turin sorkar phût

Lunglei District Youth Congress Committee (LDYCC) chuan, Lunglei District Jail aṭanga mi panga an tlan chhuah theih chhan chu sorkarin jail a hlamchhiah vanga an ngaih thu tarlangin, jail ngaihsak turin sorkar an phût.

April 19, 2023 zing khawvar hmain Lunglei District Jail-a táng mi panga an tlan chhuah avangin LDYCC hruaitute chuan nimin khan District Jail an tlawh a; jail aṭangin táng mi panga an tlanbo chu pawi an tih thu sawiin, "Awlsam taka mi panga an tlân chhuah theina chhan hi Mizoram sorkarin Lunglei District Jail a hlamchhiah vang leh a tih tur a tih loh vanga thleng niin kan ngai," an ti.

LDYCC tarlan danin, Lunglei District Jail-ah hian thawktu mi 23 awm turah mi 13 chiah an awm a, medical duty tur an awm lo a, nurse pakhat awm ve mah se, Serchhipah dah (attach) mek a ni thung. Pharmacist awm ṭhin chu January 2023-ah pension-in a chhuak tawh a, a aiawh tur dah a la ni lo.

Lunglei District Jail hi mi 100 tàn theihna tura ruahman a nih laiin, mi 150 (mipa 134 leh hmeichhia 16) an táng mek. Ambulance pakhat tih loh chu lirthei dang an nei lo a, driver an neih loh avangin rîkrum thilah chuan ambulance khalh turin warden pawh chawp ṭhin a ni.

Táng an tlân chhuah theih chhan chu thawktute inthlahdah vang ni loin, thawktute indaih loh vang leh sorkarin a tih tur a tih loh vanga an ngaih thu sawiin LDYCC chuan, "District Jail, Lunglei hrim hrim hian thawm ṭhat a mamawh em em vek a, staff quarters-te a tlabal em em a, thawktute'n thâ leh zung séngin an thawm ṭha ṭhin," an ti.

LDYCC chuan, duty post pasarih awm zingah Mizoram Home Guard duty-te'n post pathum chiah an luahlum thei tih sawiin, "Duty indaih lohnate hi remchangah lain, duty awm lohna post zâwnah hian tlân chhuah nan an hmang ṭhin a ni," an ti a; Lunglei District Jail-a Mizoram Home Guard duty indaih lohna a rang thei ang bera dah belh turin Mizoram sorkar an phût.

Lunglei District Jail-in harsatna an tawh hrang hrangte chu May 18, 2022 khan media-te'n a hmunah enin an lo tlangaupui tawh tih sawiin LDYCC chuan, "Kum khat dáwn hnuah pawh an harsatna tawhte Mizoram sorkarin sutkian a hnêka thawktute a hma aia indaih loa sorkarin an dah hian District Jail a ngaihthahzia a ti chiang em em a ni," an ti bawk.