Civil Services Day 2023 hmang; CM-in sorkar hnathawkte Mizoram tan hmathlir neia kal turin a chah

Nimin April 21 kha Civil Services Day a ni a, Mizoram hmun hrang hrangah hman a ni. Adminis­trative Training Institute auditorium-a Civil Service Day hman chu chief minister Zoram­thanga'n a hmanpui a, sorkar hnathawkte chu Mizoram tan hmathlir neia kal turin a chah.

CM Zoramthanga chuan, Pathianin Mizote ram nuam tak a pek thu sawiin, "Mizoramah mihring nuai 10 vel kan awm a, Japan mi emaw Israel mi emaw nuai 10 vel awm ta se, kum 10-20 chhungin India rama per capita income sang berah an siam thei ang. Boruak nuam tak, la bawlhhlawh lo, ruah ṭha leh lui eng emaw zat kan nei a, Pathianin economic potential min pek hi kan hman ṭangkai a ngai," a ti.

Sorkar hnathawkte chu Mizoram tana hmathlir ṭha neia theihtawp chhuah tura chahin Zoramthanga chuan, "Mizoram hmasawnna atan thawktu in ni a, hmathlir nei ula, kan tihlawhtling ang a, India rama per capita income sang berah Mizoram kan siam ang," a ti a; mipui rawngbawltu ṭha ni tur chuan mahni hmasial loa mi dang ṭhatna tur ngaihtuah leh dawhtheihna neih a pawimawh thu a sawi.

Chief Minister chuan, "Hmathlir leh phûrna ṭha tak nen, economic molecule-a khat Mizoram tinung (activate) tur hian uranium tlemtê kan mamawh a, chumi atan chuan hma latu tur in ni," a ti bawk.

Inkhawm kaihruaitu chief secretary Dr Renu Sharma chuan, civil service hna thawktu tam tak chu mahni mihringpuite ṭhatna tur leh ram leh khawtlang tan thil ṭha thawka thâ thawh ve duh vanga lut an nih thu a sawi a, "Ram inrêlbàwlna khawlah mawhphurhna pawimawh tak chang kan nih avangin kan hnathawhah thlei bik nei loin, mi lâk tlak leh rin tlak tak, dan zahawmna vawnghimtu ni chungin hna thawk ang u," a ti.

Civil Service Day hmannaah hian Government Website Excellence Award 2022-23 sem a ni a, Chief Minister-in sorkar department 10 hnenah website ṭha lawmman a hlàn a, Chief Secretary-in zirna-in 10 hnenah lawmman a hlân thung.

Kumina Civil Service Day thupui chu 'Service to the people' tih a ni a, district hrang hrangah pawh hman a ni.

India ramin zalenna a hmuh hnua Home minister hmasa ber Sardar Valla­bhbhai Patel-a'n admi­nistrative services officer-te hmaa Delhi-a thu a sawi ní, April 21, 1947 chu Civil Services Day atan hman a ni a; mipui rawngbawl tura inhlan tharna ní atan hman ṭhin a ni.