Táng tlân chhuakte jail-ah dah lut

April 18, 2023 zing khawvar hmaa Lunglei District Jail aṭanga tlân chhuak mi panga zinga pahnih chu April 20, Ningani zan khan Mausen Branch YMA hruaitute'n an man a, Lunglei police hnenah hlàn niin, jail-ah dah luh leh an ni tawh.

Thu dawn danin, Lunglei Jail aṭanga tlân chhuak an mante chu Lalbawihliana (27) leh Dokapthang (26), Zokhawthar ve ve an ni a, Ningani zan dar 8 pelh hnu khan Mausen khaw bula hotel pakhatah an lut a ni. Hotel neituin táng tlân chhuak an nia hriain Mausen khaw mite a hriattir a, Mausen YMA hruaitute'n an man ta a ni.

Lalbawihliana leh Dokapthang te hi Lung­lei Jail-a hmeichhe ward bul aṭangin an chhuak a, táng tlân chhuak ve dang mi pathumte nen an inthu­rual lo a, an tlân chhuak rual lo niin an sawi.

Lunglei Police Station aṭanga thu dawn danin, táng tlân chhuakte lakah hian IPC Section 224 leh 120B tlawhchhanin thubuai ziah luh belh a ni a; mi pahnih man leh tâkte chu jail-ah dah luh leh tawh an ni.

Tarlan tawh angin, táng tlân chhuak panga zinga man leh tâk mi pahnihte hi ruihhlo vanga man, NDPS Act hnuaia thubuai nei an ni a; tlan chhuak dang pathum - mi thattua puh Lalchawimawia (24) leh, ruihhlo vanga man pahnih - Haudeihchhuin (25) leh Vanneihthang (38)-te chu he thu ziah lai thleng hian man an la ni lo a, zawn mek zel an ni.