Congress party treasurer aṭangin Zodintluanga Ralte-in bànna a thehlut
Mizoram Pradesh Congress Committee (MPCC) treasurer Zodintluanga Ralte, Congress Legislature Party leader ni bawk chuan nimin chhun khan MPCC treasurer a nihna aṭanga bànna MPCC president Lalsawta hnenah a thehlut. Congress party aṭang erawh chuan a báng lo a, party tan theihtawp a chhuah zel dawn thu a sawi.
Zodintluanga Ralte chuan bànna lehkhaah, MPCC President zah tak leh hreh tak chungin MPCC treasurer a nihna aṭangin bànna thehlut a ni tih sawiin, Pathian leh a thawhpuite duhsakna avangin MPCC treasurer a ni a, a lawm thu leh a phûr thu a tarlang.
Zodintluanga chuan, "Lungrual takin kan thawkho ang a, Mizoram tan leh kan party tan nasa takin kan bei tlâng ang a, kan hma lawka MLA General Election-ah hnehna nasa tak kan chang leh ngei ang tiin beiseina sang tak ka nei ve ṭhin. Amaherawhchu, ka beisei angin thil a kal ta hauh lo mai a. Bànna rawn thehluh mai loh chu tih theih neia ka inhriat tâk loh avangin hreh tak chungin i hnenah he ka bànna lehkha hi ka rawn theh lut ta a ni," a ti a; Congress party a chak zawk nan leh inlungrualna atana ti a nih thu a sawi.
Bànna a thehluh chhan a ziahah Zodintluanga chuan, Mizorama Congress party hruaitu hmasate'n kalphung nghet taka an vawn leh humhim ṭhin, Committee-a innghat a nihna chu kum 2021-a Lalsawta MPCC president a nih aṭangin sâwi nghîna a awm thu a tarlang a, "Committee sáng taka kan rêlho ṭhin zawng zawng pawh President-in mi pahnih khat lek ráwnin thutlukna i siam ta fo mai a... chuvang chuan he treasurer post zahawm tak hi chelh reng thei niin ka inhre lo a, bànna ka thehlut ta a ni," a ti.
Zodintluanga Ralte chuan, Congress party aṭangin a báng lo tih sawiin, "Congress party aṭangin ka báng lo a, Congress party-in sorkarna kan chan leh ngei theih nan ṭhahnemngai takin ka thawk chhunzawm zel dawn a ni," a ti a, Congress party tan theihtawp a chhuah zel dawn thu Vanglaini palai a hrilh.
Zodintluanga Ralte chuan, district committee office bearer-te tihdanglam a nihin MPCC Executive Committee-ah rèl a nih ṭhin laiin, tunah chuan rèlho a ni tawh lo tih sawiin, "Lunglei DCC siam rem a nih khan eng committee-ah mah rêlho a ni lo a, nimin maia Aizawl DCC siam rem a nih pawhin eng committee-ah mah rêlho a ni lo. Hei hi Congress kalphung a ni lo a, elected OB-te pawh biakràwna rorel a awm ngai lo," a ti a; mi pakhat duh dana kal ṭha a ti lo a, MPCC treasurer nih reng a rem tawh loa a ngaih thu a tarlang.
Nomination Committee din dawna member ruatah ràwn a ni lo tih sawiin Zodintluanga chuan, "Member i duh ang i ruat hnuah telephone-in min hriattir ve lek a. Tun hnaia member Pathum ruat belh an nih khan ràwn ka ni lo a, ka hre lo hrim hrim a. Elected OB ka nih zui zel hi a ṭulna awmin ka hre lo..." a ti.
Zodintluanga Ralte chuan, party hotu ṭhenkhatte aṭangin President-in Political Affairs Committee (PAC) a ring zo tawh lo a, PAC meeting koh pawh ṭul a ti tawh lo tih a hriat thu a sawi a, "Tuna PAC member-te hi duhsak taka vice president leh president thlenga hlángkaitu che an nih avangin zah leh ngaih pawimawh an ṭul hlein ka hria. I elected OB puite hriatpui loa PAC member ni lai mekte ṭhiat a, PAC thar siam i tum tih ka lo hria hi a lungchhiatthlak hle," tiin a tarlang.
ZODINTLUANGA BÀN CHHANTE
1. Congress party innghahna lungphûm sâwi nghîna tihchhiat mek a ni.
2. Nomination Committee member ruatah ràwn a ni lo.
3. Political Affairs Committee (PAC) member ni mekte ṭhiah a, PAC thar siam tum lungchhiatthlak a ti.