Two-wheeler taxi khalhtu vit hlumtu Lalfakmawia jail-ah dah a ni

Lalfakmawia s/o Henry Lalrokima, Samlukhai chuan April 20, Ningani zan khan two wheeler taxi a hman khalhtu Lalrammawia (24) h/o Lalramsiami, Bawngkawn a vit hlum a, Lalfakmawia hi jail-ah dah luh a ni tawh.

Thu dawn danin, Lalfakmawia hian Ningani zan dar 8 vel khan Lalrammawia two wheeler taxi a hmang a, Zemabawka Zokhawsang péng bulah a chhuk a, chuàn man chungchanga an inhnial avangin Lalfakmawia chuan Lalrammawia chu chemtein a nâkah a vit a ni.

Lalrammawia hi tawhsual a tawhna bul hnaia mite'n Greenwood Hospital an panpui a, mahse, a hliam tuar loin zan dar 10 velah a thi. Lalfakmawia hi police-in an man nghal a, jail-ah dah luh a ni tawh tih police hotute chuan an sawi.

Thil thleng chungchangah hian Aizawl Two-wheeler Taxi Association (ATTA) chuan thuchhuah siamin, an eizawnpui Lalrammawia vit hlumtu Lalfakmawia chu dàn hmanga a na thei ang bera hrem an phut thu an tarlang a, "Hetiang thil râpthlâk hi thleng nawn tawh lo se kan ti a, kan eizawnnaah hian hmuh hniam emaw, inhmuhsitna emaw, in-risk-na ang chi hi awm tawh lo turin mipui kan ngen a ni," an ti.

Samlukhai VC, YMA, MUP, MHIP leh MZP-te pawhin thuchhuah inṭâwm siamin, an khaw mi Lalfakmawia'n Lalrammawia laka pawi a khawih chu hrehawm an tih thu an tarlang a, "Pawi khawihtu hi kan demin, hetiang thil hi thleng tawh lo se kan ti. Chhiat tâwk chhungte leh Bawngkawn mipui kan tawrhpuiin thuphá kan cháwi a ni," tiin, Lalrammawia nupui fanaute Pathianin thlamuanin awmpui se an duh thu an tarlang.