KHAWTHLIR

Bial inkhawmpui

Mizoram Presbyterian Kohhrana pastor bial hrang hrangte chuan nizan aṭang khan bial inkhawmpui an ṭan a, Pathianni zanah a ṭiak ang. Nizan khan palai lawmna leh report inkhawm hun hman a ni a, vawiinah rorel a ni ang a, zanin leh naktuk chawhma, chawhnu leh zanahte vantlang Pathian biak inkhawm neih a ni ang. Nikum report-a a lan danin, Mizoram Presbyterian Kohhran hnuaiah pastor bial 297 leh tualchhung kohhran 1,130 a awm mek a ni.

AR-in heroin man

Serchhipa hmunpui nei Assam Rifles sipaite chuan April 20, Ningani khan Zokhawtharah heroin gram 509 (hawng 44) an man a, a kawltu nen Champhaia Customs department hnenah an hlan. Heroin an man hi Rs 2,54,50,000 hû a ni.

Lei khâr dawn

Keiṭum leh Khawlailung inkara Tuichang lei dawh thar chu April 26, 2023-ah hawn a ni dawn a, inbuatsaih a ngaih avangin Serchhip SP Vanlalnghenga chuan April 24-26, 2023 inkarah lei dawh thar chu khâr tur a nih thu a puang. Lei thar khâr chhungin lei hlui zawkah lirthei metric ton 10 aia zâng phurte tlân theih a ni.

Yuva Utsav rêl

Kumina Lungleia Yuva Utsav (ṭhalaite kût) hman dan tur ngaihtuahin Organising Committee chu Lunglei DC Conference Hall-ah an ṭhukhawm a, district bawrhsap Ramdinliani'n a kaihruai. Yuva Utsav hi April 28-a HATIM-a hman tura tih tawh ni mah se, zirlaite exam hun lai a nih dawn avangin June 9-a hman turin an rél a, intihsiak buatsaih dan turte an rél bawk.

Personality development

Zirtiri Residential Science College chuan nimin khan RIPANS-ah personality development programme an hmang a, final semester zirlaite an kal. Chawhma lamah RIPANS Optometry-a assistant professor Dr R Lalduhawmi'n 'Stress management' tih thupui a sawi a, chawhnuah Nursing demonstrator Lalmuanpuii Hnamte-in 'First aid skills' tih thupui sawiin, first aid hman dan a zirtir a ni.