Home Minister-in Kawrpuichhuah a tlawh; Insumdawn tawnna tura hmalakna a en
Home minister Lalchamliana chuan nimin zingah khan Kawrpuichhuaha India leh Bangladesh insumdawn tawnna tura hmalaknate a enfiah a; 15th Finance Commission-in India ram puma fire station tihchangtlun nan Lunglei district bik tan cheng nuai 400 a dah thu leh chu chuan Tlabung Fire Station a huam thu a sawi.
Lalchamliana chuan, Bangladesh nena insumdawn tawnna tura ruahmanna tipuitling turin Mizoram sorkarin theihtawp a chhuah nia sawiin, "Kawrpuichhuah integrated check post-in a ken tel inkalpawhna lei dawh kai tur chu a ruangám duan danah tih fuh tâwk loh a awm vangin tih ṭhat leh mek a ni a, ruahman ang chuan Home department pawhin immigration check post bun kan tum," a ti a; Bangladesh ram lama chengte nen inlaichìnna ṭha tak neih tum turin mipui a chah.
15th Finance Commission-in India rama fire station tihchangtlunna turin cheng vbc. 1,500 a ruahman tih sawiin Minister chuan, "Lunglei district tan cheng nuai 400 dah a ni a, hemi hmang hian Tlabunga Fire Station pawh tuam a ni ang," a ti.
Lalchamliana chuan, kut hnathawktute khaichhuahna tura SEDP kalpui mekah sorkar kum kal mek chhungin chhungkaw 60,000 dang tuam tum a ni thu leh a hmaa Rs 50,000 dawng tawh chhungkaw 60,000 hnenah pawh ṭanpuina pek leh tum a nih thu a sawi bawk a ni.
Home Minister hi West Tuipui bialtu MLA Nihar Kanti Chakma, IGP (Hqrs) John Neihlaia, DIG (Southern Range) H Ramthlengliana leh Lunglei SP Rahul Alwal ten an ṭawiawm a ni