Ral lo tâwkin Pathian hruainain Mizoramin hmasawnna a nei zel - Lal Thanzara

Mizoram Pradesh Congress Committee (MPCC) vice president Lal Thanzara chuan, Mizo ram leh hnam ral lo tâwkin Pathian kaihhruaina hnuaiah Mizoramin hmasawnna a neih zel thu leh, ZPM party-in BJP sum leh pai ṭanpuina an dawng châk hlea a rin thu a sawi.

Lal Thanzara hian nimin khan Congress Bhavan-a political session-ah thu sawiin, "State kan nih hnu kum 30 chhunga hmasawnna awm miah lo anga ZPM ho sawi hi chhàn lêt tlâk a ni lo. Thil chîk mite'n Mizoramin kawng hrang hranga hmasawnna kan neih hi an hre chiang. Kan ram leh hnam ral lo tâwkin Pathian kaihhruaina hnuaiah Mizoram hian hmasawnna kan nei zel a ni," a ti.

Mizoramah MNF dinhmun a hniam hle tih sawiin Lal Thanzara chuan, "Congress party suih têt nan BJP hian MNF hi rin tlakah an ngai tawh lo. BJP malsawmna hi ZPM lamin an dawng lo ang tih a sawi theih loh. Congress party tihtlâk nan BJP hian tih hreh an nei lo a, chutih rualin, sorkar siam ve hrim hrim tum ZPM hian BJP sum leh pai ṭanpuina an dawng châk khawp ang," a ti a; chutiang chu ni mah se, Congress mipui tan zâmna tur a awm loh thu leh BJP lama ṭan aiin Pathian lama ṭan a hlâwk zawk thu a sawi.

Congress Vice President chuan, BJP chu sakhaw dang rahbeh tumtu an nih avangin an rorelna hnuaiah Kristian missionary-te an him lo nia sawiin, "Hindu lal ram din tumtu BJP hi Kristiante tana an hnawksakzia hretute chu kohhran mipui kan ni. Hei hi Mizorama Kristian mithiamte pawhin ngaih­ven lehzual se a duhawm hle. Congress party chu sakhaw tih bik nei lo kan ni a, India rama Kristiante’n harsatna an tawhin Mizoram chief minister ṭhin Pu Lal Thanhawla kha an thla­muanpui ṭhin hle a ni," a ti.