Mizoram independent sual kha kan tih tur dik tak a ni - K Vanlalvena
MNF National Core Committee member K Vanlalvena, Rajya Sabha MP chuan, Laldenga hoa MNF-in India laka zalenna (independence) an sual chu an tih tur dik tak, Mizote'n an chanvo an chan theihna tura beihna a nih thu a sawi.
K Vanlalvena chuan nimin khan Mizo Hnam Rûna inkhawmah thu sawiin, "Pu Laldenga khan India aṭangin mipui min hruai chhuak lo a, kan rilru a hruai chhuak a ni. Independent sual kha kan tih tur dik tak, kan chanvo chang tura kan beihna a ni," a ti.
Mizoram independence movement awm lo se chuan Mizo zingah vai hming pú an tam tawh hlea a rin thu sawiin K Vanlalvena chuan, "Indian nationalism aṭangin Mizo nationalism-ah min hruai lut a, kan hnam innghahna kulhpui ber chu vai ngaihsan lohna a ni ta," a ti a; Pathian remruat ang zelin, tharum thawha hrehawm tawrh reng remti loin, remna kawngah a hruai ta niin a sawi.
K Vanlalvena chuan, Rom 13:1-a ziak angin, roreltute chu Pathian ruat an nih thu sawiin, "Hei hi tun hma aṭanga tun hun leh hun lo la awm tur thlengin a dik dawn. Mizoram politics-ah pawh Pathian min hruaina a dik chat chat zel. Kan hun tawn azir zelin Pathianin roreltu min pe ṭhin," a ti.
MNF NCC member chuan, Covid-19 vanga economy tlâkhniam dan a rapthlak tak zet a, ram ropuite pawh an tâlbuai tih sawiin, "Kan ram ngeiah pawh mipui kan rethei a, kan la tuar mek a, kan mangang a ni. Kan sorkar leh dan tur ngaihtuahna ai pawhin mipui retheihna dâwm kân dan tur kan ngaih pawimawh hmasak zawk a ṭul," a ti bawk.