Earth Day pualin sarâng bawlhhlawh tifai
Mizoram Pollution Control Board (MPCB) leh Mizoram EIACP Hub chuan nimin khan Earth Day pualin Mizoram New Capital Complex (MINECO) huam chhungah hman khat daih sarâng (single use plastics) bawlhhlawh then fai hnatláng an huaihawt.
Hnatlángah hian MPCB-a thawk mi 45 chuang an thawk chhuak a, hlâwm hrang hrangah inṭhenin, MINECO huam chhunga kawng dung leh luikawra sarâng bawlhhlawhte an chhar khawm a, Tuiriala bawlhhlawh sâwngbàwlnaah an paih a ni.
Earth Day hi April 22 a ni a, thupui chu 'Invest in our planet' tih a ni. Kumina Earth Day pual hian Mizoram EIACP Hub chuan Mizorama eco-club zirlaite pualin online hmangin plastic bawlhhlawh tihrêm leh plastic thlâkna tur tih thupui hmangin article drawing competition leh poster making competition a buatsaih bawk.