CYMA hruaitute'n ráltlân awmna tlawh

Central YMA hruai­tute chuan nimin khan Myanmar aṭanga sahimna zawnga Mizorama tlanchhiate awmna, Zokhawthar refugee camp an tlawh. Zokhawtharah hian ráltlân mi 5,604 an awm mek a ni.

CYMA hruaitute hi president R Lalngheta hoin an kal a, Central Exe­cu­tive Committee member eng emaw zat bakah, Champhai Sub-Hqrs, Tuipuiral Group leh Vanhnuailiana Group hruaitute an tel a; Zokhaw­thar VC president Lalmuanpuia kaihhruaiin khawtlang hruaitute nen an inkâwm.

R Lalngheta chuan, Zokhawthara Myanmar ráltlânte dinhmun chiang zawka hriat an duh vanga kal an nih thu sawiin, "Ráltlân awm rei tawh leh awm nghet deuhte chu ei leh in anmahnia an indap dan kan zawn a ṭha khawp mai. Ráltlân an pung zel a, ṭanpuitu an tlem tial tial a, ṭan lehzual a ngai dawn. Kan unaute an ni a, kan unaute'n min rawn bèl a nih chuan kan hnar tur a ni lo a, kan theih ang angin kan lo tuamhlâwm tur a ni," a ti.

CYMA hruaitute sawi danin, Zokhawtharah hian Myanmar ráltlân mi 5,604 an awm mek a, Zokhawthar khelmualah an chenna tur in (camp) siam a ni. Camp-ah an len loh avangin hmun dangah sawn tum a ni a, sawnna tur in sak mek a ni.