Pawi khawihna tuartute zángnadawmna pe

Champhai District Legal Services Authority (DLSA) chuan nimin khan Champhai judicial district chhunga pawi khawihna tuartu mi 26 hnenah chawmdawlna/zangnadawmna (victims of crime compensation) Rs 87,25,000 an sem.

District & sessions judge Liansangzuala, DLSA chairman ni bawk chuan, danin thil sual titu hrem mai bakah pawikhawihna tuartute dikna leh zahawmna vawn nun a duh thu a sawi a, "Zangnadawmna dawngtu tur thlangtu committee din a ni a, zangnadawmna pek ṭhin a ni. Mizoram Victims of Crime Compensation Scheme, 2011 hnuaia sorkarin pawikhawihna tuartute zangnadawmna tur cheng nuai 100 a pek aṭanga nuai 87.25 lai Champhai judicial district-a pawikhawihna tuartu mi 26-te'n an dawng thei hi a lawmawm hle," a ti.

Liansangzuala chuan, "Pawikhawihtute hrem mai piah lamah, pawikhawihna tuartute chawmdawlna turin victim compensation duan a ni a, victim compensation hmuh beisei vanga inpuhna dik lo titute chu dan anga hrem theih an ni," a ti a; danin inkaihhruaina a siam angin pawikhawihna tuartute kutah ngei zangnadawmna hlan a nih theih nan hmalak a nih thu a sawi bawk.