Hna ṭha, tlo leh rintlak tur ngaihtuah a pawimawh - Tawnluia

Deputy chief minister Tawnluia chuan nimin khan Thakthing Venga Government Multi Utility Centre sak thar a hawng a, "Mipui tana hna kan thawh hian sum senso lam ringawt ngaihtuah loin, hna ṭha, tlo leh rintlak tur kan ngaihtuah a pawimawh," a ti.

Tawnluia chuan, Government Multi Utility Centre chu mipui vantlang tan sorkarin a siam a nih thu sawiin, "UDPA department hmalakna hrang hrang, Smart City, SIPMIU leh project pawimawh tak tak zinga Aizawl khawpuiin a chhawr ṭangkai tur hnathawh pawimawh tak a ni," a ti a; UDPA-in hna an thawhna hrang hrangah ṭawiawma finchhuah zel turin mipui a ngen.

Government Multi Utility Centre hi UDPA department-in state sorkar sum nuai 884.73 hmanga an sak a ni a, May 12, 2019-ah sak ṭan niin, January 30, 2023 khan sak zawh a ni. Centre-ah hian parking, office, weekend market leh auditorium-te a awm.