Bekang hriak herna khawl thar hawng

Agriculture minister C Lalrinsanga chuan nimin khan Serchhip Agriculture Complex-ah bekang hriak her chhuahna kháwl leh a dahna in thar a hawng a, loneitute hnenah hmanrua a sem bawk.

Hriak herna khawl thar hi RKVY-RAAFTER 2021-22 aṭanga hmuh Rs 2,80,000 sénga lei a ni a, a dahna in tur hi cheng nuai 20-a sak a ni. Khawl hian bekang, chhawhchhi, anṭam têl leh badamte a her thei a, bekangah an insáwrbing dawn a ni.

Minister hian oil palm chíngtu chhungkaw 100 hnenah alluminium leilâwn leh hreité (tomahawk) a hlàn a; Serchhip district-a thlai chíngtu intél khawm, farmer interest group panga - Léng, Hualtu, Zawlpui-Chamdur, East Lungdar leh Thenzawlte hnenah multipurpose crates (plastic basket) 20 ṭheuh a hlan bawk.

Serchhip district-ah hian khaw 12-a chhungkaw 334-in oil palm an chíng mek a, ram hectare 386-a zauah oil palm kûng 47,762 an enkawl. Oil palm hi chhungkaw 53-in quintal 4,777 an hralh tawh a ni.