Sorkar hnathawk hlawh la la lo an tam; IFMIS hman thiam loh vang a ni - Finance
Mizoram sorkar hnathawk zinga tam tak chuan nimin thleng khan hlawh an la la thei lo. Sorkar department hrang hranga sum lam khawihtute'n hlawh pek chhuahna kalphung thar, Integrated Financial Management and Information System (IFMIS) an la hman thiam tâwk loh vang nia thu dawn a ni.
Finance department aṭanga thu dawn danin, sorkar hnathawkte hlawh chu IFMIS kaltlangin dila pek chhuah vek tawh tur a ni a, department hrang hranga sum lam khawihtute chu an department-a thawkte hlawh (salary bill) zawng zawng IFMIS kaltlanga Finance-a thehlut turin nikum aṭang khan tih an ni.
Finance department hotute chuan, hlawh tur sum a awm nia sawiin, "Sorkar hnathawkte hlawh tur sum chu a awm reng a, department tam zawka sum khawihtute'n IFMIS an hman thiam tâwk loh avang leh, ṭhenkhat chuan an zir thiam mai duh loh avangin sorkar hnathawk zingah hlawh la tlai an awm ta a, hei hi chu department tina DDO leh pawisa khawihtute thiam loh a ni," an ti.
Finance department chuan, IFMIS hmanga salary bill thehluhte chu tihkhawtlai awm loin an pe chhuak nghal zel tih an sawi a; chutih rualin, sorkar hnathawkte zingah hlawh la lo an la tam zawk thu an sawi. Hetih lai hian, hlawh la tawh eng emaw zat an awm bawk.
Department tam zawk chuan kalphung thar an hman thiam loh avangin salary bill an thehlut hlei thei lo a, chuvang chuan April thla tàwp dawn hnaih lamah pawh March thla hlawh la thei lo an la tam niin an sawi a, "Tunah pawh hian department ṭhenkhat chuan an harsatna an rawn sawi chuan kan pe zel a, sawi lo na nâ nã chu pêk ngaihna a awm lo a ni," an ti.
Finance department hotute chuan, kalphung thar IFMIS chu nikum kum tìr aṭanga kalpui turin an ti tawh a, mahse, department tam taka DDO leh sum lam khawihtute'n an la hmang thiam lo tih an sawi a ni.