Zodintluanga'n Congress chhuahsan a tum lo; 'Báng lo turte'n kan la ngen ang' - Lalsawta

Mizoram Pradesh Congress Committee (MPCC) treasurer aṭanga April 21, 2023-a bànna thehluttu Zodintluanga Ralte, MLA chuan Congress party chhuahsan a tum lo. Hetih lai hian, MPCC president Lalsawta chuan Zodintluanga hi báng lo tura an la ngen tur thu a sawi.

Vanglaini palai zawhna chhangin Zodintluanga chuan, MPCC treasurer aṭangin bànna thehlut mah se, an party chhuahsan a tum tihna a ni lo tih a sawi a, "Congress party hi kan sorkar leh ngei theihna atan theihtawp ka chhuah zel dawn. Congress party chhuahsan tumna ka nei lo," a ti.

Zodintluanga Ralte chuan, an party ṭhat tlànna zawk tura bànna thehlut a nih thu sawiin, "Ka bànna thehluhah pawh ka ziak lang," a ti a, tun karah pawh West Phailengah Congress party programme-ah thu a sawi dawn thu a sawi.

Zawhna chhangin Delhi-a châm mek MPCC president Lalsawta chuan, Zodintluanga'n bànna a thehluh chungchangah sawi theih a la nei loh thu a sawi a, "Báng lo turte pawhin kan la ngen ang chu," a ti.

Lalsawta chuan, Delhi-ah a la awm avangin Zodintluanga Ralte bànna lehkha a la hmu lo tih sawiin, "Kan Vice President-in lehkha hi a dawng a, tunah hian Congress Bhavan-ah a awm," a ti a, Aizawla a haw hunah a thawhpuite nen an ngaihtuah tur thu a sawi.

Tarlan tawh angin, Congress Legislature Party leader Zodintluanga Ralte hian MPCC treasurer aṭanga bànna April 21, 2023 khan a thehlut a, a bàn chhante a ziak a ni.