Nakkumah lawmman dawn leh kan tum - Ngopa VC President
India rama gram panchayat (village council) 2 55,000 vel zinga hna thawk ṭha ber lawmman dawngtu Ngopa VC lawmpuina April 22, Inrinni khan Ngopa Welfare Committee (NWC) leh Ngopa Student Union (NSU)-te'n NWC secretary F Rodingliana inah an buatsaih a, Ngopa VC president K Lalremsiama chuan kum 2024-ah pawh lawmman dawn leh ngei an tum thu a sawi.
Ngopa VCP chuan, an khuain harsatna naménlo an tawh thu sawiin, "Harsatna naménloin min delh chungin theihtawp kan chhuah a, harsatna aṭangin lawmna a rawn chhuah a ni. Khawtlang mipui chungah lawmthu kan sawi a, tlawmngai pawlte nen pawh kan thawhhona a ṭha hle. Kan khuaa department tinte an ṭangkai em em a, kan nodal deparment LAD-in min phûrpui hle. Heng zawng zawngte avanga lawmman hi dawng thei kan ni," a ti.
Kum 2024-ah pawh lawmman dawng turin Pathian malsawmna dil chungin theihtawp an chhuah dawn thu sawiin K Lalremsiama chuan, "Pakhatna nih leh ngei kan tum. Chumi tur chuan kan pawisa dawn hi a nihna tur takah hman a ngai a, a nihna tur takah hman kan tum dawn," a ti a, Pathian malsawm tlaka hmalakhopui zelah kal khawmte a sáwm.
NWC secretary F Rodingliana pawhin thu sawiin, Mizoram chu tehna hrang hrangah a chhe lama a lan fo laia Ngopa khawtlangin India rama VC ṭha ber lawmman an la thei chu Mizoram tan a ṭha lama bul ṭanna ni thei se a duh thu a sawi a ni.