Home Minister-in Lunglei Jail a enfiah

Home minister Lal-cham­liana chuan April 22, Inrinni zing khan Lunglei District Jail a tlawh a, jail hungna bang thawm ṭhat ngaite chu thawm ṭha turin hmalak nghal a nih dawn thu a sawi.

Minister hian Lunglei District Jail-a ward hrang hrang te, Jail Superintendent office te, jail bang hungna thawh ṭhat ngai laite leh tun hnaia mi panga an tlân chhuahna laite a en a; IGP John Neihlaia, Lunglei bawrhsap Ramdinliani leh Lunglei SP Rahul Alwal ten an ṭawiawm.

Lunglei District Jail hotute chuan, thawktu an indaih loh avangin dah belh a ṭul thu leh Jail Superintendent office chu a chung lamah sak zawm a ṭul thu an lo thlen a; Lalchamliana chuan, a theih anga bawhzui a tum thu a sawi bakah, jail hungna bang thawm ṭhat ngai laite chu thawm ṭha turin hmalak nghal a nih dawn thu a sawi.

Home Minister hian jail-a tángte tlawhin, harsatna an tawh leh tawh loh a zâwt a; tángte chuan ei leh in leh tuiah harsatna an tawh loh thu an lo hrilh a ni.