Tlungvelah in pali a kâng

April 23, Inrinni tlai dar 5 vel khan Tlungvel Dawrkawnah kângmei a chhuak a, in pali a kâng a, mi pakhat a hliam.

Tlungvel aṭanga thu dawn danin, kângmei hi T Lalhriatpuia dawr, lirthei ke siamna dàwr (tyre workshop) aṭanga chhuak a ni a, thîr chàrna khawl (welding machine) an hman mekin dawr chhunga petrol dah a tihkan vanga chhuak a ni.

Lirthei ke siamna dawr bakah hian C Lalnuntluangi in, Lalrinchhani Sailo thingpui dawr leh chenna in ni nghal bakah, Lalram­mawii dawrte a kâng ral.

Kângmei ṭhelhna lamah lirthei ke siamna dawr neitu T Lalhriatpuia ke pahnih a kâng hliam a, Thingsulthliah damdawi-in panpui a ni.

Kângmei chhuahna hmun hi bialtu MLA, Lalrinawma, minister in a tlawh nghal a, khawtlang hruaitute hnenah tarpauline leh Rs 5,000 a pe a, kângmei tuarte tan rângva pek a tum thu a sawi.