Thla 7 chuang hret chhungin CADS-in cheng nuai 3,547.24 hû ruihhlo an man

Central YMA-in ruihhlo do tura Sep-tember 9, 2022 aṭanga Central Anti Drug Squad (CADS) a din thar leh hnuah April 16, 2023 thleng khan cheng nuai 3,547.24 hû ruihhlo an man tawh a, chumi kaihhnawihah chuan mi 1,561 an man tawh.

CYMA vice president Lalhma­chhuana tarlan danin, CADS hian September 9, 2022 aṭangin ruihhlo doin hma an la ṭan a, kumin April 16 thleng, thla sarih chuang hret chhung khan ruihhlo Rs 35,47,24,996 an man tawh. Ruihhlo kaihhnawiha an man mi 1,561 zinga mi 937 chu counselling neihpuiin, ruihhlo tih leh zawrh an sim theih nan kawng kawhhmuh an ni.

CYMA-in ruihhlo do tura CADS a din thar leh hnuah CADS member-te chu hun chhung neia ruat an ni a, member an inruat thar zel ṭhin.

Tun thlengin CADS batch pali an awm tawh a; batch khatnate'n September 9 aṭanga November 17, 2022 thleng, batch hnihnate'n November 18 aṭanga December 31, 2022 thleng, interim batch-te'n January 1 aṭanga February 14, 2023 thleng leh, batch thum­nate'n February 15 aṭang­a tun thlengin hma an la a ni.

CYMA Vice President chuan, ruihhlo hluar chhan chu ruihhlo man a tlakhniam vang a nih thu sawiin, "Ruihhlo man hi tun hma aiin a tlahniam hle a, drugs-a inchiu ṭhin pawh an pung sâwt viau. Ruihhloa inchiu ṭhin hi mi 11,693 (June 2022) MSACS-in an record mek a ni," a ti a; Myanmar ram buai avangin dan leh thupek a mumal lo a, ruihhlo tawlh leh dan loa bungraw tawlh a hluar thu a tarlang.

Ruihhlo vanga harsatna tâwk chhungkua leh mimal an pung zel tih sawiin Lalhmachhuana chuan, "Ruihhlo man tur a pung zel bawk. Mizo ṭhalaite thisen hîp kang zawnga ruihhlo hmanga sumdawng inti hausa pawh hriat tur an awm ta zel. Home/centre hrang hrang a khat a, ruihhlo vanga khung hran ngai leh enkawl ngai an tam hle a, ṭan lâk a tul hle," a ti a; ruihhlo laka ṭhalaite venga chhan chhuak turin kil ṭinah ṭan lâk a ṭul thu a tarlang bawk.