KHAWTHLIR

Candidate puang

ZPM party chuan May 9, 2023-a Chakma Autonomous District Council (CADC) inthlanpuia an candidate turte April 22, Inrinni khan Chawngte (Kamalanagar)-ah an puang. ZPM candidate turte hi mi pakua an ni a, ZPM general secretary Lalmuanpuia Punte-in Chawngtea ZPM pisaah a puang a ni. CADC-ah hian MDC bial 24 a awm a, chu'ng zinga 20 chu mipui thlan tur niin, pali erawh chu chief executive member-in a ruat tur a ni thung.

Methamphetamine

Assam Rifles leh Mizoram Police CID (Crime) hnuaia Special Narcotic Police Station chuan nimin khan Falkland Vengah Methamphetamine (meth) mum 14,600 an man a, Rs 4,86,61,800 hû a ni. Meth neitua puh Lianchithanga (35) s/o Ṭialchhawna, Champhai Kanan Veng nia inchhál an man bawk a, police-in thubuai an ziak lut a ni.

Ganja man

Mizoram Police CID (Special Branch) leh BSF-te chuan April 21, Zirtawpni khan Sesawng Lawibualah pick-up truck, Lalawmpuia (30) s/o Hranga (L), Sakawrdai Chhimveng, Aizawl district nia inchhál khalh aṭangin ganja kg. 54 an man a, Bawngkawn Police Station-ah thubuai ziah luh a ni.

Sector officer

Lawngtlai district election officer David Lalthantluanga chuan April 21, 2023 khan May 9, 2023-a CADC-a MDC inthlanpui felfai taka neih a nih theih nana bial (sector) ṭhen hrang hrang vil tura ruat sector officer 12-te chu DC conference hall-ah a kâwm.

Tlawng lui tifaiin  TKP an hnatlang

ṬKP, Lunglei Chanmari Bial chu April 22, Inrinni khan Tlawng lui fintu Sipai lui leh Nghasih lui dung tifaiin an hnatlang. Hnatlang hi Bial ṬKP rorel bawhzuina a ni a, mi ṭhahnem tak an thawk chhuak a, lui dunga bawlhhlawh ṭawih thei lo awmte chharin, bawlhhlawh paihna hmunah an paih a ni. Mizoram mipui tui tlan ber, Tlawng lui tui a thianghlim zawk theih nan leh luia nungchate an pun theih nan mahni in bul kawrah leh hmun remchangah bawlhhlawh paih mai mai lo turin mi tin an ngen nghal bawk.